Aqtóbede joǵalǵan balalar ózen jaǵasynan tabyldy
AQTÓBE. QazAqparat - Aqtóbede mektep-ınternattyń úsh tárbıelenýshisi tabyldy. Olardy aýyl turǵyny ózen jaǵasynan tapty, dep habarlaıdy QazAqparat tilshisi.
Yrǵyz aýdanyndaǵy mektep-gımnazııanyń ınternatynda jatatyn úsh bala joǵalyp ketip , aman-esen tabyldy. Olardy izdeýge aýdannan ondaǵan adam jumyldyryldy.
«Іzdeýge shyqqan kezde ózen jaǵasyna bardym. Sol jerde aıqaılap uzaq júrdim. Árqaısysynyń atyn atap shaqyrdym. Bir kezde álsiz dybys shyqty. Olar qaıyqqa otyryp, ózenniń arǵy betine ótip ketken. Attaryn atap, báriniń tiri ekenine kóz jetkizdim de jaýaptylarǵa qońyraý shaldym. Sebebi tún salqyn, ózendi júzip ótý múmkin emes edi. Olar tońyp qalǵan»,- dedi aýyl turǵyny Batyrhan Sermaǵanbet.
Aıta keteıik, balalardyń tabylǵanyn oblystyq TJD baspasóz qyzmeti de rastady.
