Aqtóbede jylytý maýsymyna daıyndyq jumystaryna 3 mlrd teńgege jýyq qarjy jumsalady
AQTÓBE. KAZINFORM — Sý, sý burý jáne jylý qubyry qalanyń birneshe kóshesinde aýystyrylady. Investıtsııalyq baǵdarlama aıasynda 6 shaqyrym qubyr jańaratylady.
Aqtóbe oblystyq energetıka jáne turǵyn úı-kommýnaldyq sharýashylyq basqarmasy, Tabıǵı monopolııalardy retteý komıtetiniń oblystyq departamenti birlesken sheshim shyǵardy. «Aqtobe su-energy group» AQ baspasóz qyzmetiniń habarlaýynsha, bıyl ınvestıtsııalyq baǵdarlama aıasynda 2,8 mlrd teńge qarastyryldy. Onyń ishinde 2,3 shaqyrymdyq sýmen jabdyqtaý júıesin jańartýǵa 1,1 mlrd teńge jumsalady. Al 1,8 shaqyrymdyq jylýmen jabdyqtaý júıesine 1 mlrd teńgeden astam qarjy qarastyryldy. Sý burý júıesin jańartýǵa 653 mln teńgeden astam qarjy jumsalady.
— Sýmen jabdyqtaý júıesinde 4, sý burýda 2 jáne jylýmen jabdyqtaý júıesinde 5 joba bar. Sýmen jabdyqtaý júıesin jańǵyrtý kezinde dıametri 160 mm bolatyn polıetılen qubyr salynady. Sonymen birge bıyl Aqtóbe qalasynda «Emshan», «Onkologııa» qazandyǵynyń jylý jelileri jańǵyrtylady, — dep habarlady Aqtobe su-energy group» AQ baspasóz qyzmeti.
Aıta keteıik, Úkimet Abaı oblysynyń jylý jelilerin jylytý maýsymyna daıyndaýǵa 2,5 mlrd teńge bóldi. Qaladaǵy syrtqy jylý jelileriniń jalpy uzyndyǵy — 325,5 shaqyrym.
Jelilerdiń tozý deńgeıi 58,2% nemese 189 shaqyrym, bul ınfraqurylymdy kezeń-kezeńimen jóndeý jáne jańǵyrtý jumystaryn jalǵastyrý qajet ekenin kórsetedi.
