Aqtóbede jylytý maýsymy qashan aıaqtalady
AQTÓBE. KAZINFORM — Oblys ortalyǵyndaǵy turǵyn úılerde jylý 17 sáýirden bastap sóndiriledi. Al medıtsınalyq nysandar men balabaqshada aıdyń sońyna deıin jalǵasady.
«Aqtobe su-energy group» AQ jylýmen jabdyqtaý jónindegi bas ınjeneri Oljas Mektepbaevtiń aıtýynsha, bıyl jylytý maýsymynda iri apatty jaǵdaı bolmady.
— Qala ákiminiń qaýlysy boıynsha jylytý maýsymy 1 qazannan bastaldy. Turǵyn úıler men ǵımarattarda, mektepterde 199 táýlikke sozylady. Bul 17 sáýirge kelip tur. Medıtsınalyq jáne mektepke deıingi uıymdarǵa 210 táýlik belgilengen. Munda 28 sáýirde aıaqtalady, — dedi Oljas Mektepbaev.
Aqtobe su-energy group jylytý maýsymy aıaqtalǵan soń kelesi kezeńge daıyndalady. Bıyl 3,84 shaqyrym jylý jelisi almastyrylady. Bul jumysqa 1 mlrd teńgege jýyq qarjy jumsalady.
Buǵan deıin habarlaǵanymyzdaı, Shymkent qalasynda 2025-2026 jylǵy jylytý maýsymy 1 sáýirde aıaqtalady.