Aqtóbede jyly aıaldamalar qurylysy áli aıaqtalmaı tur

AQTÓBE. KAZINFORM – Qurylys qańtar aıynyń sońyna deıin jalǵasady. Ázirge keıbir eski aıaldamalar súrilip, jańasynyń qańqasy ǵana tur. 

Aqtóbe qalalyq sáýlet jáne qala qurylysy bólimi eski aıaldamalardy jańǵyrtý kezinde ony senimgerlik basqarýǵa berýge sheshim qabyldady. Ornyna jyly aıaldama salynyp jatyr. Sonymen birge jańa shaǵyn aýdandarǵa da birden jyly aıaldama ornatylady. Kásipker oryndy satyp ala almaıdy, tek jaldaıdy. Talap boıynsha aldyn ala kelisim jasalǵan syzbaǵa saı pavılon salýy tıis.

– Búgingi tańda 26 aıaldama pavılony senimgerlik basqarýǵa berildi. Qurylys jumystaryn júrgizip, jan-jaǵyn abattandyrady, ishin taza ustaıdy. Qysta jyly, jazda salqyn bolýy tıis. Beınebaqylaý kamerasyn qondyrady. Balalar men múgedektigi bar adamdardyń arbasyna arnalǵan pandýs qarastyrylýy tıis. Sonymen birge qoqys jáshikterin ornatyp, uıaly telefon qýattaıtyn múmkindik jasalady. Adamdarǵa arnalǵan eki oryndyqtyń jalpy uzyndyǵy 3 metrden kem bolmaýy tıis. Senimgerlik basqarýǵa alǵan kásipkerler elektr jelisin tartýǵa arnalǵan jer jumystaryn kesh bastaǵan. Jyly aıaldamalar qurylysy qańtar aıynyń sońyna deıin jalǵasady, - dep habarlady Aqtóbe qalasy ákiminiń baspasóz qyzmeti. 

Qazirgi kezde aıaldamalardyń birinde qur qańqasy tursa, keıbirinde qurylys jumystary aıaqtalyp qalǵan.

Aıta keteıik, bıyl jyl basynda Pavlodar qalasynda jabyq tıptegi 12 jyly aıaldama boldy. Alaıda ishi óte salqyn bolyp, turǵyndar shaǵym aıtty.