Aqtóbede jyl basynan beri jol-kólik apatynan 27 adam kóz jumdy
AQTÓBE. KAZINFORM — Jol apatynyń kóbi Samara-Shymkent tasjolynyń Aqtóbe-Yrǵyz aralyǵynda boldy. Polıtsııa dál osy aralyqta «Joldaǵy qabyldaý» aktsııasy ótkizip, júrgizýshilermen kezdesti.
Aqtóbe oblysy aýmaǵynda barlyǵy 105 jol-kólik apaty boldy. Jol apaty kezinde 27 adam kóz jumyp, 700-den astamy jaraqattandy. Jol apaty Samara — Shymkent tasjolynda jıi tirkeledi.
— Samara–Shymkent respýblıkalyq avtojolynda qozǵalys kóp. Jyl basynan beri munda 43 jol-kólik apaty tirkeldi. Bes adam mert bolyp, 78-i jaraqat aldy. «Joldaǵy qabyldaý» aktsııasy kezinde osy baǵytty tańdaýdaǵy maqsat — qaýipsizdikti kúsheıtý. «Zań men tártip» tujyrymdamasy aıasynda sharaǵa polıtsııa, prokýratýra, «QazAvtoJol» AQ jáne TJD ókilderi qatysty. Júrgizýshilerge qoldanystaǵy zańnama normalary túsindirildi, — dep habarlady Aqtóbe oblystyq PD baspasóz qyzmeti.
Aktsııaǵa jas jol ınspektorlary da qatysty. Oqýshylar júrgizýshilerge óz qolymen jazǵan úndeý hattaryn taratyp, kólik tizgininde muqııat bolýǵa, jyldamdyq rejımin saqtaýǵa jáne jol qozǵalysyna qatysýshylardyń ómirin qorǵaýǵa shaqyrdy. Jalpy aktsııa barysynda 300-den astam adamǵa keńes berildi.
— Bizdiń basty mindetimiz — joldardaǵy qaýipsizdikti qamtamasyz etý jáne quqyq buzýshylyqtardyń aldyn alý. Jol qozǵalysyna qatysýshylarmen aradaǵy ashyq dıalog problemalyq máselelerge der kezinde jaýap berýge jáne halyqtyń quqyqtyq mádenıetin arttyrýǵa múmkindik beredi, — dedi Aqtóbe oblystyq PD bastyǵynyń orynbasary Ardana Saımaǵambetov.
Aıta keteıik, Aqtóbede bıyl jol-kólik apatynan qaza tapqan adamdar sany 31,6% artty. Kóbi respýblıkalyq tasjolda boldy.
