Aqtóbede jyl basynan beri 4 adam óndiris ornynda kóz jumǵan

AQTÓBE. KAZINFORM – Bıyl 5 aıda óndiriste barlyǵy 31 jazataıym oqıǵa tirkelip, 4 adam qaza tapqan.  

Aqtóbe oblystyq eńbek ınspektsııasy jónindegi basqarmasy bıyl birinshi toqsanda 100-den astam tekserý ótkizdi. Nátıjesinde 45 jumys berýshige usynys berilip, 10,5 mln teńge aıyppul salyndy.

- Bes aıda 31 jaǵdaı tirkelip, tórteýi ólimmen aıaqtaldy. Soǵan baılanysty arnaıy tekserý júrizilip, polıtsııaǵa 30-dan astam materıal joldandy. Mundaı jaǵdaı kóbine taý-ken, munaı óndirý salasynda tirkeledi. Degenmen byltyrǵyǵa qaraǵanda jazataıym oqıǵa azaıdy, - dedi Aqtóbe oblystyq eńbek ınspektsııasy jónindegi basqarmasynyń basshysy Jandos Álimov. 

Aıta keteıik, byltyr 80 adam óndiristik jaraqat aldy. Onda 13 adam kóz jumdy. 

Eske salsaq, buǵan deıin Aqtóbe qalasynda 2 mamyr kúni úıinen shyǵyp, qaıta oralmaǵan oqýshy qyzǵa izdeý salynǵanyn jazǵan edik.