Aqtóbede «jıhad» jarııalaýdy úgittegen «ımam» sırııalyq agent bolýy yqtımal - Q.Qasymov

ASTANA. QazAqparat - QR ІІM Aqtóbedegi lańkesterge sırııalyq yqpaldyń bolǵanyn ne bolmaǵanyn taldaıtyn bolady. Bul týraly búgin QR Іshki ister mınıstri Qalmuhanbet Qasymov málim etti.

«Lańkester páterlerinde jınalǵan kezde, áldebir «ımamnan» qasıetti «jıhadqa» shyǵý jóninde úndeý tastaıdy. Bul ımam Sırııa baǵytynan bolý múmkin degen kúdik bar. Tergeý barysynda ony áli dáleldeý qajet. Lańkestikke daıyndalǵan 45 adamnyń ishinen «jıhadqa» barýdan bas tartqandar osyny aıtýda», - dedi mınıstr.

Eske sala keteıik, 5 maýsymda Aqtóbede terakt oryn aldy. 25 adam aldymen qarý dúkenine, keıin áskerı bólimshege shabýyl jasady. Saldarynan Ulttyq ulannyń 3 áskerı qyzmetshisi men 5 beıbit turǵyn qaza tapty. 7 áskerı qyzmetshi men 12 polıtseı jaraqat aldy. Qazirgi ýaqytta teraktige qatysqandardyń barlyǵy ustaldy jáne keıbiriniń kózderi joıyldy. Tergeý júrgizilýde.

Elde 40 kúnge lańkestik qaýipiniń «sary» deńgeıi belgilendi.

Búgin mınıstr habarlaǵanyndaı, lańkestikke bastapqyda 45 adamnan turatyn top daıyndalǵan. Alaıda onyń 20-sy keıin jıhadqa barýdan bas tartqan.