Aqtóbede jigitter ǵana emes, qyz-kelinshekter de radıkaldanyp jatyr - sarapshy

ASTANA. QazAqparat - Búgin SarapTime pikirtalas klýbynyń «Álem. HHІ ǵasyr» Manıfesi: terrorızm qaýipinen beıbit álemge shyǵatyn jol» taqyrybynda ótken otyrysynda Din isteri jáne azamattyq qoǵam mınıstrligine qarasty Din isteri komıtetiniń Din máseleleri jónindegi ǵylymı-zertteý jáne taldaý ortalyǵynyń ǵylymı ádistemelik jáne taldaý bóliminiń basshysy Turar Ábýov 200 maman Aqtóbe oblysyndaǵy eldi mekenderdi aralap, teris dinı aǵymǵa ergen adamdarmen jeke-jeke jumys istegenin málim etti, dep habarlaıdy QazAqparat.

Osy 200 mamannan quralǵan top Aqtóbe oblysynlda er azamattar ǵana emes, ǵalamtor men jeli arqyly kóp qyz-kelinshek radıkaldanyp jatqanyn anyqtaǵan. Biraq, pikirtalas klýbynyń otyrysynda sóz sóılegen T.Ábýov óz baıandamasynda ondaı qyz-kelinshekterdiń sany qansha ekenin aıtqan joq.

«Memleket basshysynyń tapsyrmasyna oraı, 29 qyrkúıek pen 29 qazan aralyǵynda Aqtóbe oblysynda keshendi is-shara ótip jatyr.Terrorızm men radıkaldy uıymdardyń aldyn alý máseleleri jónindegi is-sharalardyń eki aptasy ótip,  endi eki aptasy qaldy. Osy eki aptanyń qorytyndysyna toqtalatyn bolsam,  200 maman oblys ortalyǵyn, shalǵaı jatqan eldi mekenderdi túgeldeı aralap, kóptegen eńbek ujymdarymen, jastarmen, sonyń ishinde ózekti bolyp otyrǵan dinı aǵym jeteginde ketken adamdarmen jekelegen kezdesýler ótkizdi. Ásirese, Aqtóbe qalasynda tek er azamattar ǵana emes, ǵalamtor men jeli arqyly kóptegen qyz-kelinshekter radıkaldanyp jatqanyn tilge tıek etýge bolady», - dedi T.Ábýov.

Sarapshy jazda Aqtóbe men Almaty qalalarynda bolǵan qandy oqıǵalardan keıin birneshe zańdarǵa tolyqtyrýlar men ózgerister engizý bastalǵanyn eske saldy. «Osy zań boıynsha bes kodeks pen 19 zańǵa ózgerister engizý josparlanǵan bolatyn. Búgingi tańda keıbir zańnamalar Májiliske jiberildi. Din isteri jáne azamattyq qoǵam mınıstrligi qurylmaı turyp ta, din isteri komıteti eldegi ekstremızm  men terrorızmniń aldyn alý máselesinde kóp jumys atqarǵan.  Sonyń bir ǵana bóligine toqtalsam, 2011 jyly qabyldanǵan zańnyń aıasynda búgingi tańǵa deıin Qazaqstanda din isteri komıteti 29 myńǵa jýyq dinı ádebıetti saraptamadan ótkizgen. 29 myń ádebıettiń ishinen bes jyl ishinde 670 ádebıetke ekstermıstik baǵyttaǵy ádebıet dep tanyldy», - deıdi ol. 
«Eger halyqtyń, jastardyń ortasynda durys dinı sana qalyptassa, terrorızm men ekstremımzmniń aldyn alýǵa tolyqtaı múmkindik bar»,-dedi sózin túıindeı kele T.Ábýov.