Aqtóbede jigitti bopsalaǵan kúdikti top ustaldy
AQTÓBE. KAZINFORM – Aqtóbede jigitti jaldamaly páterge aparyp, keıin ony bopsalaǵan top ustaldy. Kúdiktiler 19 jastaǵy qyz ben eki er adam.
Aqtóbe oblystyq Polıtsııa departamenti baspasóz qyzmetiniń habarlaýynsha, qyz áleýmettik jeli arqyly 25 jastaǵy jigitpen tanysady. Keıin jaldamaly páterge aparady. Sol kezde páterge eki er adam kelip, ózderin polıtsııa qyzmetkeri retinde tanystyrady. Ári kámeletke tolmaǵan qyzben jynystyq qatynasqa túskeni úshin aıyptap, odan qomaqty aqsha bopsalady.
- Tergep-tekserý barysynda kúdiktiler buryn sottalǵan eki jergilikti turǵyn men 19 jastaǵy boıjetken ekeni anyqtaldy. Olar aldyn ala sóz baılasý arqyly jábirlenýshini bopsalaý shemasyn qurǵan. Jas jigitpen áleýmettik jeli arqyly tanysqan qyz ony jaldamaly páterge shaqyrǵan. Keıin bul jerge kúdiktiler kelip, ózderin quqyq qorǵaý ogandarynyń qyzmetkeri retinde tanystyrǵan. Olar boıjetkenniń «kámeletke tolmaǵanyn» jáne onyń erkinen tys jynystyq qatynasqa túskenin aıtyp, 2 mıllıon teńge bopsalaǵan. Ustalǵandar kinásin moıyndady jáne ýaqytsha ustaý ızolıatoryna qamaldy. Sotqa deıingi tergep-tekserý júrgizilip jatyr,- dep habarlady Aqtóbe oblystyq Polıtsııa departamentiniń baspasóz qyzmeti.
Eske salsaq, byltyr Aqtóbede adam bopsalaýmen aınalysqan stýdentter toby quryqtaldy.