Aqtóbede jetim balalardyń esepshoty 71 mıllıon teńgege tolyqty
Aqtóbede «Týǵan jer» baǵdarlamasy aıasynda iske asyrylyp jatqan jumystar qaraldy. «Týǵan jerge taǵzym» aktsııasy aıasynda óńirde 300-den astam joba qolǵa alyndy. Quny - 554,5 mıllıon teńge. Oblys ákiminiń orynbasary Erbol Nurǵalıevtiń aıtýynsha, jyl sońyna deıin quny 2,8 mıllıard teńge bolatyn taǵy 645 joba júzege asyrylýǵa tıis.
Jıyn kezinde «Baqytty bala» óńirlik jobasynyń iske asyrylý barysy da sóz boldy. Bıyl 118 myń bala jazǵy demalyspen qamtylady. 10 myńnan astam bala Qazaqstannyń qasıetti jerlerine tegin saıahat jasaıdy, júzdegen jetkinshek Reseı Federatsııasynyń Orynbor oblysy, Tatarstannyń, Ózbekstannyń saýyqtyrý jáne bilim berý lagerlerine barady.
«Baqytty bala» aktsııasy aıasynda ata-anasynyń qamqorlyǵynsyz qalǵan jáne jetim balalardyń esepshoty 71,2 mln teńgege toltyryldy. Tek Aqtóbe qalasynyń ózinde 25 jetim bala baspanaly boldy. Múgedek balalar qymbat turatyn medıtsınalyq kómekti tegin alady, sonyń ishinde týa bitti sal aýrýyna shaldyqqan jáne omyrtqa jotasy qısaıǵan eki bala Ońtústik Koreıaǵa emdeýge jiberildi. Erekshe qajettilikteri bar balalardyń quqyǵyn qamtamasyz etý jáne ómir súrý sapasyn jaqsartý sharalary da qabyldanyp jatyr. Atap aıtqanda, aýtızm dertimen týǵan, sóıleý jáne tirek-qımyly buzylǵan 117 bala balabaqshaǵa baryp júr. Týa bitti sal aýrýyna shaldyqqan, aýtızm derti bar balalarǵa psıhologııalyq, medıtsınalyq-pedagogıkalyq keńes berý, ońaltý ortalyǵy, erekshe qajettiligi bar balalarǵa jyl boıǵy lager ashylady dep kútilýde»,- dep habarlady oblys ákiminiń baspasóz qyzmeti.
«Atqarylyp jatqan is Elbasynyń «Rýhanı jańǵyrý» baǵdarlamalyq maqalasynyń bir bóligi bolyp tabylady. Biz olardyń tolyq, sapaly ári tıimdi júzege asyrylýyn qamtamasyz etýge tıispiz»,- dedi oblys ákimi B. Saparbaev.