Aqtóbede jergilikti taýar óndirýshilerdiń jumysy ádettegideı júrip jatyr

AQTÓBE. QazAqparat – Aqtóbede áleýmettik mańyzy bar taýarlar ýaqytyly saýda oryndaryna jetkizilip jatyr. Óńir basshysy búgin birqatar kásiporyn jumysymen tanysty, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Birinshi surypty unnan jasalatyn nan, qaraqumyq, kúrish, ósimdik maıy, sıyr eti, jumyrtqa, kartop, qyryqqabat, sábiz, pııaz, qant, aıran-sút, súzbe baǵasy turaqty bolýy tıis. Óńir basshysy Ońdasyn Orazalın azyq-túlik baǵasynyń turaqtylyǵyn baqylaý maqsatynda birqatar kásiporyndy aralady. Aımaq basshysy aldymen «Jańa Áljan» un kombınatynyń un jáne makaron ónimderi qoryn tekserdi. Jylyna 110 myń tonna un, 7,2 myń tonna makaron óndiretin kásiporynda jaǵdaı turaqty. Zaýyt basshysy Beknur Beıisovtyń aıtýynsha, kelesi astyq jınalǵanǵa deıin bıdaı qory tolyq jetkilikti. Sondyqtan baǵany kóterýge esh negiz joq. Qazir munda kúnine 500 tonna un daıyndalady.

Al ósimdik maıyn óndiretin «Aqtóbe Fýds» JShS, «Rokos Group Global» kásiporny táýlik boıy jumys isteıdi. «Aqtobe Fýds» JShS jylyna 40 myń tonna ónim shyǵarady. Shujyq óńdeýshi «Rokos Group Global» kompanııasynyń qory 1 300 tonna qus etimen tolyqqan. Aldaǵy eki aıda oblys naryǵyn tolyq qamtýǵa múmkindigi bar. Atalǵan mekemelerdiń basshylary oblys ákimine baǵa kóterilmeıdi dep ýáde berdi. Budan soń óńir basshysy «AgroOptServıs» JShS kóterme bazarynda jáne «Aıbek» tutyný kooperatıviniń et konservi tsehynda boldy. Bazar basshysy Bekbolat Bıbolatov azyq-túliktiń jetkilikti ekenin aıtty. Saýda ortalyǵynyń qorynda 400 tonna kartop, 130 tonna sábiz, 180 tonna qyryqqabat, 300 tonna pııaz bar. Tsehta konservi, shujyq jáne jartylaı fabrıkattar bólimderi bar. Tseh qýattylyǵy jylyna 4 680 tonna konservi ónimderin, 1 500 tonna shujyq, 300 tonna jartylaı fabrıkat quraıdy. Mal soıý alańyna aýdandardan kúnine 50 bas iri qara jetkizilip jatyr.

Oblys ákimi Ońdasyn Orazalın sútti qaıta óńdeıtin «Aıs Plıýs» JShS, «Prıgorodnyı» JShS, kókónisterdi óndirý jáne saqtaý qoımasy, «Atameken-Nan» JShS jumystarymen tanysty. «Aıs Plıýs» JShS kúnine 35 tonna sút óndiredi. Áleýmettik mańyzy bar ónimniń úsh túrinde baǵa ózgermegen. «Prıgorodnyı» JShS-de kókónis qory jetkilikti. Qoıma jylyna 5 000 tonna ónim saqtaýǵa qaýqarly. Oblys ákimi Ońdasyn Orazalın orynbasary Amanǵalı Berdalınge kúndelikti tutynatyn ónimderdiń baǵasyn únemi qadaǵalap otyrýdy tapsyrdy.