Aqtóbede jergilikti dızaınerler men tiginshilerdiń sán kórsetilimi ótti
AQTÓBE. QazAqparat - Aqtóbede tiginshiler men dızaınerler óz kıim úlgilerin kórsetti. Sán kórsetilimine 50 adam qatysty, dep habarlaıdy QazAqparat tilshisi.
Aqtóbede dızaınerler men tiginshiler alǵash ret bas qosty. Osy arqyly dızaınerler men tiginshiler qaýymdastyǵy jergilikti qolóner sheberlerin biriktirip, úlken isterdi birlese sheshpek. Sán kórsetilimi kezinde aýdan, aýyldan tiginshiler kelip, olar óz kıim úlgilerin kórsetti. Kóbi ulttyq kıimge basymdyq bergen. Jańa bastamany oblys ákimi Berdibek Saparbaev qoldap, sáttilik tiledi.
«Aýdan, aýyldan kelgen adamdarǵa bul tájirıbe alańy bolady. Sońǵy sán úlgilerimen qatar ulttyq qundylyqtarymyzdy nasıhattap, salt-dástúrimizdi saqtaýymyz kerek. Biz dızaınerler men tiginshiler qaýymdastyǵyn qoldaımyz. Aldaǵy ýaqytta «Analarǵa taǵzym» ortalyǵy ashylady. Ortalyqta qolóner sheberleriniń de óz qoltańbasy bolady»,- dedi Aqtóbe oblysynyń ákimi Berdibek Saparbaev.
Sán kórsetilimine Aqtóbedegi sángerler stýdııasynyń jastary men balalary qatysty. Olar ózderine tigilgen kıim úlgisin kórsetip, arnaıy jolmen júrip ótti.
«Kıim tigý urpaqtan urpaqqa tarap keledi. Ájem, anam kıim tigip, ulttyq kıimderdiń úlgisin saqtap qalýǵa septigin tıgizdi. Al ózim 2011 jyldan beri osy salaǵa keldim. Buǵan deıin esepshi bolyp, jumys istegen edim. Adamnyń boıyndaǵy talant pen sheberlik, anadan úırengen óner jeńip shyǵady eken. Men jylyna eki ret dızaınerlik toptamany jańartyp turamyn. Árqaısysy bir danamen tigiledi»,- dedi «Asyl qazyna» brendiniń dızaıneri Malına Dúısenbaeva.
Sán kórsetilimine prokýratýra, polıtsııa qyzmetkerlerine arnaıy kıim tigip júrgen sheberhana ıeleri de qatysty. Memlekettik mekemelerden tapsyrys qabyldaıtyn tiginshiler bul joly arnaıy kıim úlgilerin kórsetti.
Aıta keteıik, sán kórsetilimine qatysqan dızaınerler men tiginshiler sheberlik sabaǵyna qatysady. Sonymen qatar, olar mata tańdaý, satyp alý, qajetti buıymdardy jasaý joldaryn úırenedi.
