Aqtóbede jergilikti bılik úsh kúnde qalany qoqystan tazartýǵa ýáde berdi
AQTÓBE. QazAqparat - Aqtóbe qalasynda qoqys ýaqytyly shyǵarylmaı jatyr. Buryn qoqys shyǵarǵan kompanııa jumysyn toqtatyp, búgin ákimdik turmystyq qaldyq tasıtyn 10 kompanııany tanystyrdy, dep habarlaıdy QazAqparat tilshisi.
Aqtóbe qalasynda qoqys úsh apta boıy shyǵarylmaı, turǵyndardyń shaǵymy kóbeıdi. Buǵan deıin habarlaǵanymyzdaı, qoqys tasyǵan «Aqjol LTD» JShS 1 mamyrdan bastap óz qyzmetin toqtatý jóninde sheshim qabyldaǵan bolatyn. Al «Taza qala» kommýnaldyq kásiporny úsh ret satýǵa shyǵarylyp, eshkim almaǵan soń qyzmetin toqtatýǵa sheshim qabyldandy. Endi Aqtóbe qalasyndaǵy qoqysty 10 kompanııa shyǵarady.
«Aqtóbe qalasyndaǵy qoqysty shyǵarý eki kompanııa úshin qıyn boldy. Al sońǵy kezde «Aqjol LTD» JShS óz mindetinen bas tartty. «Taza qala» jumysyn toqtatýǵa májbúr. Sondyqtan qalany 10 bólikke bólip, konkýrs jarııalandy. Buǵan deıin jergilikti kásipkerlerdi kómektesýge shaqyryp, olardyń qyzmetin paıdalanýǵa týraly keldi. Olardyń arnaıy tehnıkalary bolmaǵan soń qıyndyqtar kezdesti. Endi arnaıy mekemeler óz jumysyna kirisedi», - dedi Aqtóbe qalalyq turǵyn úı-kommýnaldyq sharýashylyǵy bólimi basshysynyń mindetin atqarýshy Álibek Serikbaev.
Aıta keteıik, Aqtóbe qalasynan jyl saıyn 200 myń tonna qoqys shyǵarylady. Ár aýdan, aýyldyq okrýgten shyǵarylatyn qoqys kólemi ártúrli.
«Qoqys shyǵaratyn kompanııalardyń barlyǵy aqtóbelik kásipkerlerge tıesili. Sondyqtan ákimdik pen kompanııa ózara kelisimshartqa qol qoımaı turǵanda da olar óz qyzmetin jasap, kómektesti. Halyq shaǵymy kóbeıgen soń qala ákimi, arnaıy bólim turmystyq qaldyq máselesin baqylaýǵa alyp otyr. Bar bolǵany úsh kúnde másele sheshiledi», - dedi qala ákiminiń apparat basshysy Nurlan Kúntýov.
Aqtóbe qalasynyń ár turǵyny qoqys úshin aı saıyn 105 teńge tóleıdi. Qoqys shyǵarý qyzmetine aldan-ala tólem jasaǵan adamdar aqshasyn burynǵy kompanııalardan qaıtaryp ala alady.
