Aqtóbede jerasty sýyn ruqsatsyz paıdalanyp otyrǵan sharýalarǵa aıyppul salyndy
AQTÓBE. KAZINFORM – Ákimshilik quqyqbuzýshylyq týraly kodekstiń 141-baby negizge alynǵan. Sharýalar shaǵym aıtyp, Aqtóbe oblystyq kásipkerlik palatasyna jınaldy.
Sharýalar men Jaıyq – Kaspıı basseın ınspektsııasy Aqtóbe oblystyq kásipkerlik palatasyna jınaldy. Sebebi Mártók, Qobda aýdandary men Aqtóbe qalasyndaǵy sharýalarǵa Ákimshilik quqyqbuzýshylyq týraly kodekstiń 141-baby, ıaǵnı, sý qoryna memlekettik menshik quqyǵyn buzý baby boıynsha ákimshilik is qozǵalyp, 1,2 mln teńge aıyppul salyndy. Buǵan deıin jerasty sýyn emin-erkin paıdalanyp kelgen sharýalar Sý kodeksindegi ózgertýler men tolyqtyrýlar týraly bilmegen.
- Aıyppul salynǵandardyń qatarynda «Nıva», «Tabanov» pen «Qanat 2», «Aqtóbe jıdekteri» JShS-i bar. Inspektsııa QR ÁQBtK-niń 141-babyn negizge alǵan. Fermerlerdiń aıtýynsha, olarǵa naqty túsindirme jumysy júrgizilmegen. Inspektsııa ókilderi tek zań normalaryna silteme jasaǵan. Talqylaý barysynda ınspektsııa mamandary bıyl naýryz aıynda aýdan ákimdikterine jańa sý paıdalaný erejelerin túsindirý jóninde hat joldaǵan. Tek Aqtóbeniń Alǵa aýdanyna ǵana baryp, fermerlermen kezdesken. Al Prezıdent 2025 jyldyń 9-sáýirinde QR Sý kodeksine qol qoıdy. Inspektsııa maýsym aıynda oblystyń barlyq aýdany men Aqtóbe qalasynda tekserý júrgizý týraly buıryq shyǵarady. Tekserýde Jem, Saǵyz, Temir, Hobda, Yrǵyz, Іlek jáne Or ózenderi, sondaı-aq basqa da sý nysandary qamtylýy tıis boldy. Maqsat – zań buzýshylyqtardy anyqtap, zańsyz sý alýdy toqtatý. Alaıda zańdaǵy jańa talaptardan fermerler beıhabar eken,- dedi Aqtóbe oblystyq kásipkerlik palatasynyń baspasóz qyzmeti.
Endi QR Bas prokýratýrasynyń Aqtóbe oblysy boıynsha quqyqtyq statıstıka jáne arnaıy esepke alý komıteti departamentiniń azamattyq jáne ákimshilik salalardaǵy quqyqtyq aqparat qalyptastyrý bólimi aldaǵy eki aptada Jaıyq – Kaspıı basseın ınspektsııasy jumysynyń zańdylyǵyn tekseredi.
- Eger zań buzýshylyq nemese ókilettikti asyra paıdalaný faktileri anyqtalsa, jaýapqa tartamyz. Keıin prokýrorlyq qadaǵalaý aktisin jasaımyz, – dedi Azamattyq jáne ákimshilik salalardaǵy quqyqtyq aqparat qalyptastyrý bóliminiń ınspektory Daner Batyrhanuly.
Aıta keteıik, buǵan deıin táýligine 50 tekshe metrge deıin sý paıdalaný úshin qandaı da bir ruqsat qujaty qajet bolmady. Al 2025 jyldyń 10-maýsymynda jańa Sý Kodeksi kúshine enip, bul norma alynyp tastaldy.
- Jaıyq–Kaspıı basseın ınspektsııasyna tekserýlerdi toqtata turyp, ótpeli kezeń qarastyrý jáne aýdandarda túsindirý jumystaryn kúsheıtý usynyldy. Ákimdik pen salalyq basqarmalar birlesip, jerasty sýyna jumsalatyn shyǵyndy sýbsıdııalaý jáne táýligine 50 m³-ke deıin sý paıdalanýǵa ruqsat talap etilmeıtin normany qalpyna keltirý máselelerin pysyqtaý usynyldy, dep habarlady Aqtóbe oblystyq kásipkerlik palatasynyń baspasóz qyzmeti.
Eske salsaq, sýdyń «kóleńkeli naryǵymen» tıimdi kúresý úshin basseındik sý ınspektsııalarynyń memlekettik baqylaý fýnktsııalary kúsheıtildi. Endi olarǵa jedel áreket etý sharalaryn qabyldaıtyn qadaǵalaý fýnktsııalary berildi. Sondaı-aq jergilikti atqarýshy organdardyń sý qoryn qorǵaý jáne paıdalaný salasynda olarǵa júktelgen fýnktsııalardy saqtaýyna memlekettik baqylaý júrgiziledi.