Aqtóbede jer telimin berýge moratorıı qansha ýaqytqa sozylatyny belgisiz
AQTÓBE. KAZINFORM – Aqtóbe oblysynda búginge deıin 50 myńǵa jýyq jer telimi berilgen. Qazirgi kezde qalada 167 myńǵa jýyq, aýdandarda 38 myńnan astam adam jer kezeginde tur.
Aqtóbe oblysynyń aýdandarynda jer telimin berý jumystary kezeń-kezeńimen jalǵasyp jatyr. Alaıda Aqtóbe qalasynda 2019 jyly moratorıı jarııalanyp, onyń qaı ýaqytqa deıin sozylary belgisiz. Sebebi buǵan deıin berilgen jer telimderine ınjenerlik ınfraqurylym áli tolyq jetkizilmedi.
- 2003-2007 jyldar aralyǵyndaǵy kezekte turǵan azamattarǵa 2014 jyldan 2021 jylǵa deıin 29 240 jer ýchaskesi bólinip berildi. Jalpy 2005 jyldan bastap qalada 38 766 adamǵa jer telimi berildi. Qazirgi kezde áli de 166 929 adam jer alý úshin kezekte tur. Ol azamattardy 10 sotyq jer ýchaskesimen qamtamasyz etý daıyndalǵan bos alańdardy (jer ýchaskelerin) ınjenerlik jelilermen qamtamasyz etý qajet. Qazirgi tańda daıyn alańdardyń bolmaýyna baılanysty jer bólý jumystary ýaqytsha toqtatylyp tur,- dep habarlady Aqtóbe oblysy ákiminiń baspasóz qyzmeti.
Aqtóbe oblystyq jer qatynastary basqarmasynyń habarlaýynsha, aýdandarda búginde 38 347 adam ótinish bergen. Olar: Alǵada - 13 405, Áıteke bıde - 615, Baıǵanınde - 769, Qarǵalyda - 1458, Mártókte - 5022, Muǵaljarda - 6117, Temirte - 2087, Yrǵyzda - 818, Hromtaýda -6174, Shalqarda -1882. Bıyl aýdandarda 201 (Alǵa-20, Qarǵaly-13, Qobda-12, Mártók-13, Temir-22, Oıyl-21 Hromtaý-100) jer telimi bólindi.
- Qazirgi tańda jergilikti atqarýshy organdar ınfraqurylymy joq oryndarǵa ınjenerlik-kommýnıkatsııa jelilerin júrgizý boıynsha jobalyq-smetalyq qujattamalar ázirlep, bıýdjettik ótinimder usynyp jatyr. Osylaısha qurylys jumystary kezeń-kezeńimen qolǵa alynyp, turǵyndarǵa jer telimderin berý máselesi sheshiledi,- dep habarlady Aqtóbe oblystyq jer qatynastary basqarmasy.
Onyń aıtýynsha, 2005 jyldan bastap aýdandarda 10 854 jer telimi berildi.
Aıta keteıik, 2017 jyldan beri Aqtóbe qalasynda 27 myńǵa jýyq adamǵa 10 sotyqtan jer berildi. Qalada 54 turǵyn alaby bolsa, jańadan boı túzegen eldimekenderde sý, jaryq, gazben qosa jol, áleýmettik nysandar joq.