Aqtóbede Jeńis kúnine oraı 4 myńnan astam adamǵa birjolǵy kómek beriledi
AQTÓBE. KAZINFORM — Óńirdegi jalǵyz soǵys ardageri Vasılıı Gretskııge 5,5 mln teńge beriledi. Sonymen birge taǵy 4 myńnan astam adamǵa materıaldyq kómek kórsetiledi.
Aqtóbe oblystyq jumyspen qamtý jáne áleýmettik baǵdarlamalar basqarmasynyń habarlaýynsha, qala men aýdandyq máslıhattardyń sheshimi negizinde 4169 adamǵa birjolǵy materıaldyq kómek kórsetiledi. Qarjy jergilikti bıýdjetten bólindi.
— Soǵys ardagerine 1272 AEK mólsherinde, ıaǵnı 5 501 400 teńge beriledi. Sonymen birge Ekinshi dúnıejúzilik soǵysy ardagerlerine teńestirilgen 1177 adamǵa 90 AEK mólsherinde, ıaǵnı 389 250 teńge qarastyryldy. Tylda eńbek etken 1948 adamǵa da osy mólsherde birjolǵy materıaldyq kómek kórsetiledi. Qaza tapqan jaýyngerlerdiń 443 jesirine 153 348 teńge bólindi. Aqtóbe qalasy jáne aýdan ákimdikteri Jeńis kúni merekesine oraı Ekinshi dúnıejúzilik soǵysy ardageri men tyl ardagerlerin turǵylyqty mekenjaılary boıynsha arnaıy baryp, quttyqtaıdy, — dep habarlady Aqtóbe oblystyq jumyspen qamtý jáne áleýmettik baǵdarlamalar basqarmasy.
Aıta keteıik, Aqtóbedegi kózi tiri soǵys ardageri Vasılıı Gretskıı Hromtaý qalasynda turady. Ol bıyl 102 jasta.
Eske salsaq, Batys Qazaqstan oblysynda bıyl Jeńis kúnine oraı 1 722 adamǵa 91,8 mln teńgege birjolǵy áleýmettik kómek kórsetiledi.
