Aqtóbede jeńil kólik velosıped mingen erli-zaıyptyny qaǵyp ketti

AQTÓBE. KAZINFORM – Aqtóbe qalasynda jeńil kólik pen velosıped soqtyǵysyp, eki adam kóz jumdy. Oqıǵa túnde boldy.

Aqtóbe oblystyq PD baspasóz qyzmetiniń habarlaýynsha 23 shilde kúni saǵat 00:50-de qaıǵyly oqıǵa tirkeldi. Qaladaǵy Aqjar-1 aýyly mańyndaǵy aınalma jolmen júrip kele jatqan kólik júrgizýshisi velosıpedke soqtyǵysqan. Saldarynan velosıpedtegi 25 jáne 26 jastaǵy erli-zaıypty kóz jumdy.

- Eki nemese odan da kóp adamnyń ólimine ákep soqqan jol qozǵalysy erejelerin buzý faktisi boıynsha qylmystyq is qozǵaldy. «Kia» avtokóliginiń 34 jastaǵy júrgizýshisi qamaýǵa alyndy. Ol Aqtóbe qalasynyń týmasy, - dep habarlady Aqtóbe oblystyq PD baspasóz qyzmetiniń jetekshisi Erbolat Sarqulov. 

Aıta keteıik, jyl basynan beri velosıped aıdap, jol-kólik oqıǵasyna tap bolǵan 3 derek tirkeldi. Onda bir adam kóz jumyp, ekeýi jaraqat aldy.