Aqtóbede jeńil jáne júk kóligi soqtyǵysyp, tórt adam kóz jumdy

AQTÓBE. QazAqparat - Aqtóbeniń Pokrovka – Jańajol tasjolynda jol apaty bolyp, 4 adam kóz jumdy, dep habarlaıdy QazAqparat tilshisi.

Pokrovka – Jańajol avtojolynyń 75-shaqyrymynda oryn alǵan jol apaty saldarynan tórt adam mert boldy.

«Temir qalasynan Keńqııaq aýyly baǵytynda kele jatqan VAZ-2113 avtokóliginiń 26 jastaǵy júrgizýshisi qarsy qozǵalysqa arnalǵan jolaqqa shyǵyp ketip, Muǵaljar aýdanynyń 50 jastaǵy turǵynynyń basqarýyndaǵy KamAZ kóligimen soqtyǵysqan. Jol-kólik oqıǵasy saldarynan VAZ-2113 avtokóliginiń júrgizýshisi men úsh jolaýshysy alǵan jaraqattarynan oqıǵa ornynda kóz jumdy. Sonymen qatar jeńil avtokóliktiń taǵy bir jolaýshysy Keńqııaq aýylynyń aýrýhanasyna jatqyzyldy. Atalǵan fakti boıynsha QR QK-niń 345-baby 4-bóligi boıynsha sotqa deıingi tergeý bastaldy», - dep habarlady oblystyq PD baspasóz qyzmeti.

Eske salsaq, Samara-Shymkent tasjolynda jantúrshigerlik jol apaty bolyp, onda alty adam kóz jumǵan bolatyn. Ol kezde «Honda-Fıt» markaly avtokóliginiń 32 jastaǵy júrgizýshisi jolda qarsy betke shyqqan. Rýlde Qyrǵyzstan Respýblıkasynyń azamaty boldy. Saldarynan Yrǵyz aýdanynyń 33 jastaǵy turǵyny basqaryp kele jatqan «Lada-Largýs» markaly avtokóligimen soqtyǵysqan. Jol-kólik oqıǵasy saldarynan «Lada-Largýs» markaly avtokóliginiń júrgizýshisi men 4 jolaýshy oqıǵa ornynda kóz jumdy. Sonymen qatar, «Honda-Fıt» avtokóliginiń jolaýshysy mert boldy. «Honda-Fıt» avtokóliginiń júrgizýshisi 30 jastaǵy jolaýshymen birge túrli jaraqatpen Yrǵyz aýdandyq aýrýhanasyna jatqyzyldy .