Aqtóbede jemqorlardan qaıtaryp alynǵan aqshaǵa Street Workout salynady

AQTÓBE. QazAqparat – Aqtóbe oblysynda bıyl jemqorlardan 197 mln teńge óndirildi. 150 mln teńgege Qumjarǵan orta mektebiniń qurylysy júrse, qalǵan qarjyǵa qalada Street Workout salynady, dep habarlaıdy QazAqparat tilshisi.

Aqtóbe oblysy boıynsha bıyl jemqorlardan óndirilgen aqshanyń áleýmettik sala qurylysyna jumsalatyny belgili boldy.

«Memleket basshysy Joldaýynda osy baǵytta tapsyrma berdi. Sybaılas jemqorlyqqa qarsy is-qımyl agenttigi júktegen mindetti oryndap, óndirilgen qarjyǵa Qumjarǵan aýlyndaǵy mektep salynyp jatyr. Oǵan 150 mln teńge bólindi. Jyl sońyna deıin qoldanysqa beriledi. Sonymen birge 47 mln teńgege qalada Street Workout salynady. Qazirgi kezde taǵy 35 mln teńge tústi. Taǵy da nysan qurylysyna jumsalady. Mektepterge basymdyq beriledi. Jalpy Qumjarǵan aýylyndaǵy mektep qurylysy úsh jyl boıy turalap qalǵan edi», - dedi Sybaılas jemqorlyqqa qarsy is-qımyl agenttigi oblystyq departamenti basshysynyń birinshi orynbasary Almat Myrzalıev.

Bul bir rettik aktsııa emes. Aldaǵy ýaqytta da jemqorlardan óndirilgen aqsha bilim ordalarynyń qurylysyna jiberiledi.

«Aqtóbe» ÁKK basshylarynan óndirilgen qarjy mine mektepke jiberildi. Olar jerdi bólý kezinde qyzmetin asyra paıdalanyp, 197 mln teńge aqshany keri qaıtardy», - dedi Almat Myrzalıev.

Aıta keteıik, qaladaǵy Trıatlon saıabaǵynda endi Street Workout salynady.

«Qalamyzda teńdesi joq Street Workout alańy boı kóteredi. Qazir joba jasalyp jatyr. Joba quny – 47 mln teńge. Bul bastamasy. Aldaǵy ýaqytta da jobany birge talqylap, qurylysty jalǵastyra beremiz», - dedi qala ákimi Ashat Shaharov.