Aqtóbede jeltoqsanshylarǵa eskertkish ornatylýy múmkin

AQTÓBE. QazAqparat - Aqtóbe oblysynyń ákimi Eraly Toǵjanov 1986 jyly Jeltoqsan oqıǵasyna qatysqan azamattarmen kezdesti, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Aqtóbe óńirinde turatyn jeltoqsanshylar byltyr «Jeltoqsan alaýy» qoǵamdyq uıymyn quryp, búginde 130-ǵa jýyq adamnyń basyn biriktirip otyr.

«Táýelsizdikti ańsaǵan ata-babamyz osy bir sheksiz-shetsiz darhan dalany aq bilektiń kúshimen, aq naızanyń ushymen qorǵap, bizge amanattady. Táýelsizdik – táńirdiń bizdiń urpaqqa bergen úlken baqyty, halqymyzdyń máńgilik qundylyǵy. Biz búginge deıingi barlyq jetistikterimizge Táýelsizdiktiń arqasynda qol jetkizdik. Prezıdentimiz Qasym-Jomart Toqaev Jeltoqsan oqıǵasy Táýelsizdiktiń jarshysy bolǵanyn jáne memleketimizdiń tarıhynda altyn áriptermen jazylǵanyn atap ótti. Osy jyldar ishinde Qazaqstan tolaǵaı tabystarǵa qol jetkizip, álemdik arenada ózindik laıyqty oryn aldy», - dedi Eraly Toǵjanov jıynda.
Jınalǵandar jeltoqsanshylardy áleýmettik qoldaý jáne ońaltý máselelerin, Aqtóbe qalasynda olarǵa arnap eskertkish ornatý, Jeltoqsan oqıǵasy týraly kitap shyǵarý, sondaı-aq keıingi urpaqty patrıottyq turǵyda tárbıeleý máselelerin talqylady.
Kezdesý sońynda oblys ákimi Jeltoqsan oqıǵasynyń qatysýshylaryn óńirdiń qoǵamdyq-saıası damýyna qosqan úlesi úshin alǵys hattarmen marapattady.