Aqtóbede jeksenbi kúni saýda úıleri men sulýlyq salondary jumys istemeıdi

AQTÓBE. QazAqparat - Aqtóbe oblysynda búgin sport keshenderi men jattyǵý zaly jumys istemeıdi. Erteń barlyq bazar jabylady, dep habarlaıdy QazAqparat tilshisi.

Aqtóbe oblysynyń sanıtarııalyq-epıdemıologııalyq baqylaý departamenti turǵyndarǵa jańa talapty túsindirdi.

«Bank, HQO men poshta qyzmetine aldyn ala jazylý kerek. Jumys jáne senbi kúnderi jumys kestesi saǵat 09:00-den 18:00-ge deıin belgilenip otyr. Jeksenbi kúni jumys isteýine tyıym salyndy. Saýna jáne monshalar jumys jáne senbi kúnderi ishki tártipke sáıkes jumys istep, jeksenbi kúni jabylady. Sulýlyq salondary, shashtaraz, SPA ortalyqtary jáne kosmetologııalyq qyzmet kórsetetin obektilerge aldyn ala jazylýy kerek. Jabyq sport obektileri (sport keshenderi, sport mektepteri, sport klýbtary, jattyǵý zaldary), fıtnes ortalyqtary jáne sporttyq-saýyqtyrý ortalyqtaryna aldyn ala jazylýy tıis. Bul ortalyqtar senbi jáne jeksenbi kúnderi jumys istemeıdi»,- dep habarlady oblystyq sanıtarııalyq-epıdemıologııalyq baqylaý departamentiniń baspasóz qyzmeti.

Sondaı-aq basseınder jumys kúnderi ishki tártipke sáıkes qyzmet kórsetse, senbi jáne jeksenbi kúnderi jabylady.

Al jeksenbi kúni SOO, saýda úılerinde, azyq-túlik emes taýarlardyń barlyq túrin satatyn dúkender, azyq-túlik jáne azyq-túlik emes bazarlar, jabyq azyq-túlik jáne azyq-túlik emes bazarlary jabylady.

Aıta keteıik, ótken táýlikte óńirde 137 adamnan vırýs anyqtaldy. Onyń 99-y derttiń sımptomdy túrine shaldyqqan.