Aqtóbede jeke úı órtenip, eki bala qaza boldy

AQTÓBE. QazAqparat – Aqtóbe qalasynda úı órtendi. Órt bolǵan jerden 4 jáne 10 jastaǵy eki balanyń denesi tabyldy, dep habarlaıdy QazAqparat tilshisi.

Oqıǵa búgin tańǵy saǵat 04:08-de tirkeldi. 112 qutqarý qyzmetine Aqtóbe qalasy Almaty aýdany Jangeldın kóshesindegi jeke turǵyn úıdiń janyp jatqany týraly habarlama tústi. Órtti sóndirýge jeke quramnan 16 adam jáne 3 birlik tehnıka jumyldyryldy.

«Shaqyrtý ornyna órt sóndirýshiler barǵan kezde jeke úıdiń as bólmesi jáne kireberis bólmesi órtenip, shatyrǵa ulasqany anyqtaldy. Órt kezinde 2013 jáne 2019 jyly týǵan 2 balanyń denesi tabyldy. 1954 jyly týǵan áıel qazir jansaqtaý bóliminde jatyr. Barlyǵy úıde 5 adam bolǵan. Órt saǵat 04:41-de oqshaýlanyp, 04:49-da sóndirildi. Órttiń aýdany - 40 sharshy metr», - dep habarlady oblystyq TJD baspasóz qyzmeti.

Qazirgi kezde órttiń shyǵý sebebi anyqtalyp jatyr.