Aqtóbede jeke turǵyn úı qurylysyna jer berý toqtatyldy
AQTÓBE. QazAqparat – Aqtóbede jeke turǵyn úı qurylysyna jer telimin úlestirý toqtatyldy. Buǵan sebep – tıisti kommýnaldyq jelilerdiń bolmaýy, dep habarlaıdy QazAqparat «Habar 24» arnasyna silteme jasap.
Málim bolǵandaı, ótken jyldary berilgen aýdandardyń ózinde turǵyndar kógildir otyn, aýyz sý men elektr jaryǵyna qol jetkize almaı otyr. Oblys ortalyǵynan on shaqyrym jerdegi Raýan-2 eldi mekenniń bir jaǵynda kommýnaldyq jelilerdiń barlyǵy júrgizilgen bolsa, ekinshi betine órkenıet attap baspaǵan.
Degenmen de, Raýan-2 aýylynda bos jatqan jer joq. Qurylys qarqyndy júryp jatyr.
Jalpy, Aqtóbe qalasy mańyndaǵy 20-dan astam eldi mekenge turmystyq órkenıettiń izi jetpegeni atap ótiledi. Bul, salaǵa jaýapty qalalyq turǵyn úı-kommýnaldyq sharýashylyǵy bólimi mamandary bar másele qarajatqa baılanysty ekendigin aıtady. Al 146 myń adamǵa jetken jer kezegi tizimi kún sanap ulǵaıyp keledi.
«Bıylǵa jeke turǵyn úı qurylysy úshin on myń jer ýchaskesin tabystaý josparlanǵan bolatyn. Alaıda, kommýnıkatsııalyq jelilerdiń bolmaýyna baılanysty toqtalyp tur. Jyl basynan bastap bes myń adam kezekke turdy. Kezekke qoıý toqtatylǵan joq. Kommýnıkatsııasy bar daıyn ýchaskeler bolǵanda berile bastaıdy», - deıdi qalalyq jer qatynastary, sáýlet jáne qala qurylysy bóliminiń sektor meńgerýshisi Jánibek Qabylov.
Birinshi kezekte ortalyq kommýnıkatsııalyq júıege irgetasy qalanyp, baspana salýdy bastap ketken úıler qosylýy tıis. Bul maqsatta jobalyq-smetalyq qujattar daıyn. Ortasha eseppen 27 mıllıard teńge qajet. Qarajat bólinse, qurylys jumystary keshiktirilmeıdi. Bıyldyń ózinde 9 joba júzege asyrylýda.
«Osy jylǵa toǵyz joba boıynsha ınjenerlik jelilerdiń qurylys-montajdaý jumystary júrgizilýde. Ol gaz jelileri Baýyrlastar-1, ekinshi kezekte Jańa qonys-2. Elektr jelisimen qamtýǵa Baýyrlastar-1, ekinshi kezekte Baýyrlastar-3, Dýman turǵyn massıvi jáne Jańa qonys turǵyn massıvi», - deıdi qalalyq TKSh bóliminiń bas mamany Bolat Serikov.
