Aqtóbede jeke mektep muǵalimderiniń jalaqy qaryzy on jumys kúni ishinde óteledi
AQTÓBE. KAZINFORM — Oblystyq bilim basqarmasy men mektep ujymy kezdesý ótkizip, problemanyń neden týyndaǵany týraly aıtyldy. Tórt aılyq jalaqy qaryzy 10 jumys kúni ishinde óteledi.
Aqtóbe oblysy ákiminiń baspasóz qyzmetiniń habarlaýynsha, oblystyq bilim basqarmasynyń ókilderi «Bilim», «Smart bilim» mektepteriniń ujymymen kezdesý ótkizdi. Onda «2025-2026 oqý jylyna arnalǵan jekemenshik bilim berý mekemelerinde orta bilim berýge baılanysty memlekettik bilim berý tapsyrystaryn ornalastyrýdyń jańa tetigi» pılottyq jobasy túsindirildi. Jańa jobaǵa sáıkes Qarjy mınıstrligine qarasty «Aqparattyq-esepteý ortalyǵy» AQ E-Qazyna.kz platformasyn engizdi. Bul jeke mektepterdegi oqýshy sanyn naqty bilýge kómektesetin biryńǵaı júıe.
— Biryńǵaı júıege saı portal avtomattandyrylyp jatyr. Muǵalimder 10 jumys kúni ishinde jalaqylaryn alady, — dedi Aqtóbe oblysy ákiminiń baspasóz qyzmeti.
Mektep muǵalimderi de oblystyq bilim basqarmasy ókilderiniń dál osylaı ýáde bergenin rastady.
Eske salsaq, eki jeke mektepte 741 qyzmetker jalaqy ala almaı otyr. Sebebi jan basyna shaqqanda tólenetin qarjy aýdarylmady. Munda 9 myń bala oqyp júr.