Aqtóbede jeke mektep muǵalimderi 4 aıdan beri jalaqy ala almaı otyr

AQTÓBE. KAZINFORM — Eki jeke mektepte 741 qyzmetker jalaqy ala almaı otyr. Sebebi jan basyna shaqqanda tólenetin qarjy aýdarylmady.

Aqtóbe qalasyndaǵy «Smart bilim» jáne «Bilim» mektepterinde 9 myńnan astam oqýshy bar. Eki mektep te jańa oqý jylynda balalardy qabyldap, jumysyn jalǵastyryp keledi. Alaıda jalaqy máselesiniń sheshimi uzaqqa sozylyp ketken. Bul týraly muǵalimder áleýmettik jelige jazyp jatyr.

— Qazir 741 adam jalaqy ala almaı otyr. Bul másele bıyl ǵana týyndamady, sońǵy úsh jyldaǵy jaǵdaı osy. Bıyl mamyr-tamyz, sodan keıin qyrkúıek-qazan aılarynyń aqshasyn ala almaı otyrmyz. Biz oqý protsesin toqtatpaımyz, balalardyń kinási joq. Qazir bári keste boıynsha jalǵasyp jatyr. Ustazdar barynsha shydamdylyq tanytyp keledi. Keıbiri jumystan ketti, kóbi shydady. Eki mektepte barlyǵy 9 myń bala oqyp júr, — dedi «Smart bilim» jáne «Bilim» mektepteriniń dırektory Aıgúl Arynǵazıeva. 

Onyń aıtýynsha, qazir tapsyrys berýshilermen baılanys ornaǵan. Buǵan deıin Oqý-aǵartý mınıstrligi men «Qarjy ortalyǵy» AQ-nan surady. Eki kún buryn Aqtóbe oblysy ákimdigi bilim basqarmasymen kelisimshartqa qol qoıdy.

— Kelisimsharttyń negizgi mazmuny sol kúıi saqtaldy. Tek tapsyrys berýshi endi oblystyq bilim basqarmasy bolady. Qaryzdy da basqarma tóleıdi endi, — dedi Aıgúl Arynǵazıeva.

Aqtóbe oblysy ákiminiń baspasóz qyzmetiniń habarlaýynsha, jeke mektepte jumys isteıtin muǵalimderdiń jalaqy ala almaı otyrǵany ras.

— Oqý-aǵartý mınıstrliginiń jańa mehanızmine sáıkes oblystyq bilim basqarmasy bólingen qarjyny aldymen ortalyqqa jiberedi. Vaýcherlik júıe arqyly «Qarjy ortalyǵy» AQ-y ony mektepterge aýdarýy tıis. Suraqtyń tolyqqandy jaýabyn mınıstrlik qana bere alady, — dedi Aqtóbe oblysy ákiminiń baspasóz qyzmeti.

Al Oqý-aǵartý mınıstrligi bolsa taıaýda bul týraly túsinik beretinin habarlady.

Eske salsaq, jyl basynda Májilis depýtaty Ashat Aımaǵambetov jeke mektepter jabylýdyń az-aq aldynda turǵanyn aıtty. Sol kezde memlekettik tapsyryspen jumys isteıtin jeke mektepterge 80 mlrd teńgege jýyq qarajat jetispegen.