Aqtóbede jeke kompanııa on balaly otbasyna páter syılady
Ulttyq kásipkerler palatasynyń «Meniń Atamekenim» aktsııasy aıasynda «Center group» kompanııasy kópbalaly otbasyǵa kómektesti. Buǵan deıin otbasy jataqhanada turdy. Otaǵasy Qonysbaı Hamzın ózge qurylys kompanııasynda tas qalaýshy bolyp eńbek etedi.
«Hamzınder otbasyn quttyqtap, tabys tileımiz. Bizdiń kompanııa osy is arqyly ózge kásipkerlerge úndeý tastaǵysy keldi. Bul jaqsy úrdistiń jalǵasqanyn qalaımyz», - dedi kásipker Samat Urmaǵambetov.
Aýmaǵy 130 sharshy metr bolatyn páter januıaǵa tegin beriledi. Al jıhaz kompanııasy óz syıyn jasady.
Otbasynyń segiz uly, eki qyzy bar. Tuńǵyshy stýdent bolsa, kishisi eki jasta. Taıaýda taǵy bir sábı dúnıege keledi.
«Biz aı saıyn 200 myń teńgeden astam ataýly áleýmettik kómek alamyz. Ózimniń jasym 36-da. Balalarymdy baılyǵym sanaımyn», - dedi kópbalaly ana Aınur Bekeeva.
