Aqtóbede jeke emhana qyzmetkeri koronavırýs týraly jalǵan aqparat taratqan
AQTÓBE. QazAqparat - Jeke emhananyń 46 jastaǵy qyzmetkeri ustaldy, dep habarlaıdy QazAqparat tilshisi.
Aqtóbe oblystyq polıtsııa departamenti áleýmettik jelini baqylaýǵa aldy. Monıtorıng júrgizý kezinde WhatsApp jelisi arqyly taraǵan jalǵan aqparatty anyqtady. Qala turǵyny aýdıo jazbany synyptastar tobyna jibergen. Sóıtip «Aqtóbede koronavırýs ınfektsııasyn juqtyrǵandardyń sany resmı aqparattan áldeqaıda kóp jáne jeke klınıkanyń barlyq qyzmetkeri karantınge jatqyzyldy» degen málimet taratty.
«Jedel-izdestirý kezinde polıtsııa qyzmetkerleri áleýmettik jeliler arqyly jalǵan aqparat taratqan 46 jastaǵy aıeldi anyqtady. Kúdikti óziniń zańsyz is-áreketin moıyndap, ókinip otyr. Atalǵan fakti boıynsha QR ÁQBtK-niń «Tótenshe jaǵdaı kezinde quqyq tártibin buzýǵa ıtermeleıtin is-áreketter« baby boıynsha ákimshilik hattama toltyrylyp, sot 40 AEK, ıaǵnı, 106 myń teńge aıyppul saldy. Aqtóbe oblysynyń polıtsııa departamenti jalǵan aqparat taratý faktilerin anyqtaý úshin kún saıyn monıtorıng júrgizip, jedel jumystar júrgizip jatyr», - dep habarlaıdy oblystyq PD baspasóz qyzmetiniń jetekshisi Erbolat Sarqulov.
