Aqtóbede jedel járdem shaqyrý ýaqyty qysqardy
AQTÓBE. QazAqparat – Jedel járdem qyzmeti on aıdaǵy jumysyn qorytyndylady. Dáriger, feldsherler biliktiligin arttyryp, bıyl 46 adam reanımobıldegi apparattardyń kómegimen qutqaryldy, dep habarlaıdy QazAqparat tilshisi.
Aqtóbe oblysyndaǵy jedel járdem qyzmetine jańa tehnologııalardy engizý úshin elimizde alǵash bop memlekettik-jekeshelik basqarýǵa berildi. Túrik kompanııasy reanımobıl jetkizip, ár brıgadaǵa planshet taratty. Qazir shaqyrýlardyń bári elektondy túrde qabyldanyp, naýqastyń anketasy toltyrylady.
«Jedel járdem qyzmetiniń sapasyn arttyrý úshin aýdandardaǵy shaqyrýlardyń bári oblys ortalyǵyna túsip jatyr. Qaladaǵy emhanalar men aýdandyq aýrýhanalarda táýlik boıy kezekshilik qoıyldy. Tórtinshi kategorııaǵa, ıaǵnı, sozylmaly aýrýǵa shaldyqqan naýqastarǵa kómekti ýchaskelik dáriger kórsetedi. Al jedel járdem ortalyǵynda 8 dıspetcher úzdiksiz shaqyrý qabyldap otyr. GPS-navıgatsııa barlyq kólikke qondyrylǵan. Biz ortalyqtan kólikterdiń qaıda barǵanyn anyq baqylaı alamyz. Táýligine 36 brıgada qyzmet kórsetedi. Onyń quramynda 18 dáriger men 18 feldsher bar», - dedi Jedel járdem qyzmeti ortalyǵynyń bas dárigeri Marat Janqulov.
Emdeý quraldarynyń arasynda elektrokardıografamma, kardıomonıtor, defıbrıllıator, jasandy tynys aldyrý apparaty men nebýlaızer bar. Bıyl medıtsına qyzmetkerleri halyqaralyq standart boıynsha júrek-ókpege reanımatsııa jasaý biliktiligin arttyrdy. Qarasha aıynda dıspetcherlerdiń jumysy tııanaqtaldy. Sonymen qatar, kólik júrgizýshileri joldaǵy qaýipsizdiktiń meńgerdi.
«Shaqyrýǵa jedel jetýge, eger naýqastyń ómiri qyl ústinde bolsa telefon arqyly úzdiksiz keńes berýge mán beremiz. Telefon arqyly keńes berip, jedel járdem jetkenshe 2-3 adamdy qutqaryp qaldyq. Sonymen qatar, zamanaýı jabdyqtary bar reanımobıl 46 adamnyń ómirin saqtaýǵa múmkindik berdi. Ondaǵy medıtsınalyq qurylǵylar jol apaty, júrek, qan qysymy aýrýyna shaldyqqandarǵa qajetti alǵashqy kómek kórsetýge múmkindik beredi», - dedi Marat Janqulov.
Aıta keteıik, oblysta táýligine jedel járdem brıgadasyna 800-ge jýyq qońyraý túsedi.
