Aqtóbede jedel járdem qyzmetine 52 reanımobıl berildi
Konstıtýtsııa kúni qarsańynda Aqtóbe oblysynyń aýrýhanalaryna jalpy quny 2 mıllıard teńge bolatyn 52 HYUNDAI jáne JAC Sunray markaly reanımobıl berildi. Bul oblystyq jedel járdem qyzmetin kólikpen túgel qamtýǵa múmkindik berdi.
«Memleket basshysynyń tapsyrmasyna sáıkes medıtsına salasyndaǵy materıaldyq-tehnıkalyq bazany nyǵaıtýǵa erekshe kóńil bólip kelemiz. Sondaı-aq jańa densaýlyq saqtaý nysandary, sonyń ishinde aýyldyq jerlerde ambýlatorııa salynyp jatyr. Oblys turǵyndaryn qoljetimdi jáne sapaly medıtsınamen qamtamasyz etý boıynsha jumys jalǵasatyn bolady», - dedi oblys ákimi Ońdasyn Orazalın.
Óńirge jetkizilgen kóliktiń 32-si Aqtóbe qalasynyń turǵyndaryna qyzmet kórsetetin bolady. Al 17 reanımobıl aýdandyq jedel medıtsınalyq járdem bólimshelerine jiberiledi. Taǵy 3 reanımobıl medıtsınalyq avıatsııa bólimshesine berildi.
«Biz óte qýanyshtymyz. Jańa avtokólikterdiń arqasynda medıtsınalyq kómektiń sapasyn arttyryp, medıtsına qyzmetkerlerin patsıentterge, al patsıentterdi medıtsınalyq mekemelerge jetkizýdi jedeldete alamyz. Ásirese aýdandyq jedel járdem qyzmetteriniń nazardan tys qalmaǵany qýantady. Oblys ákiminiń qoldaýynyń arqasynda biz avtokólikterge degen qajettilikti tolyǵymen jaýyp tastadyq», - dep atap ótti Oblystyq jedel járdem stantsııasynyń bas dárigeri Marat Janqulov.
Aýdandyq aýrýhaǵa qyzmetkerleri de mundaı qoldaý jedel qyzmettiń sapasyn kóterýge múmkindik beretinin aıtyp otyr.
«Jańa reanımobıl óte jaqsy tartý. Aýdandyq aýrýhanalarǵa qajetti tehnıka dep bilemiz. Biz endi naýqastarǵa der kezinde kómektese alamyz. Bizde úsh reanımobıl bar, mynaý tórtinshisi. Aýdan Aqtóbe-Atyraý tas jolynda ekenin eskersek, jańa kóliktiń paıdasy tıeri sózsiz», - dedi Alǵa aýdandyq aýrýhanasynyń bas dárigeri Nurbolat Medeýbaev.
