Aqtóbede jedel járdem kólikteriniń birinshi sanattaǵy shaqyrtýlaryn onlaın baqylaýǵa bolady

AQTÓBE. KAZINFORM – Rentgen, KT jáne MRT qorytyndysy PACS júıesi arqyly taldanady. «ıAndeks. Kartalar» arqyly birinshi sanattaǵy jedel járdem kólikteriniń qozǵalysy baqylanady.

Aqtóbede bilim berý, densaýlyq saqtaý, jumyspen qamtý salalarynda JI qoldaný, jumysty júıeleý úshin birneshe joba iske asyryla bastady. Oblystyq tsıfrlyq tehnologııalar basqarmasynyń basshysy Áset Otarbaevtyń aıtýynsha, jasandy ıntellektti qoldaný úshin aýyldy ınternetpen qamtý kerek. Búginde Aqtóbede 274 aýylǵa ınternet qosylǵan. Bul aýyl halqynyń - 97,5%. Sonymen birge 14 aýylǵa mobıldi baılanys ornatylady. Al adam sany 100-ge jetpeıtin 18 eldimekendi spýtnıktik OneWeb júıesi arqyly qamtý josparlanǵan.

- Tsıfrlyq tehnologııalar densaýlyq saqtaý salasynda naqty nátıje berip jatyr. Máselen rentgen, KT jáne MRT túsiriliminiń qorytyndysyn taldaý úshin jasandy ıntellektti qoldanatyn PACS júıesi engizildi. Shildeden beri shamamen 36 myń zertteý júrgizildi, jasandy ıntellekt 34 paıyzynan patologııalardy anyqtady. Aqtóbede telemedıtsına da engizildi. Aýdan turǵyndary oblys ortalyǵynyń mamandarynan onlaın-keńes alyp jatyr. «ıAndeks.Kartalar» arqyly birinshi sanattaǵy jedel járdem kólikteriniń qozǵalysyn baqylaý jobasy iske qosyldy, - dedi oblystyq tsıfrlyq tehnologııalar basqarmasynyń basshysy Áset Otarbaev.

Onyń aıtýynsha, «Otbasynyń tsıfrlyq kartasy» jáne azamattardyń ótinishterin avtomatty túrde jikteıtin E-Otinish júıesine jasandy ıntellekt modýli engiziledi. Respýblıkalyq mańyzy bar joldy ınternetpen qamtý úshin bıyl 1 núkte qosylyp jatyr. Taǵy tórteýi josparda bar. Al 2026 jyly 12 núkte úshin respýblıkalyq bıýdjetten qarjy suramaq.

Eske salsaq, AI-Sana baǵdarlamasy aıasynda 650 myń stýdent jasandy ıntellekt negizderine oqytylady. Bul týraly QR Ǵylym jáne joǵary bilim mınıstri Saıasat Nurbek málim etti.

Aldaǵy 5 jylda 1 mıllıon adam jasandy ıntellekt daǵdylaryna úırenedi. Bul týraly mınıstr Jaslan Mádıev aıtty.