Aqtóbede jedel járdem brıgadasyna jol bermegen júrgizýshiler jazalandy

AQTÓBE. KAZINFORM — Jyl basynan beri 6 júrgizýshi ákimshilik jaýapqa tartyldy. Árqaısysyna 20 AEK kóleminde aıyppul salyndy.

Aqtóbe polıtsııasy dabyl belgisi qosylǵan kólikterge, onyń ishinde jedel járdemge jol berýge shaqyrdy. Mundaı quqyqbuzýshylyq jıi bolmasa da tirkelip turady.

— Jyl basynan beri Aqtóbe qalasynda jedel járdemge jol bermegen 6 júrgizýshi jaýapqa tartyldy. Máselen 23 shilde kúni jedel járdem qyzmeti shuǵyl shaqyrtýǵa bara jatty. Sol kezde Toyota Prado avtokóliginiń júrgizýshisi dabyl belgisine qaramastan jol bermeı, qozǵalysyn jalǵastyrǵan. Oqıǵa ornynda bolǵan patrýldik polıtsııa ekıpajy júrgizýshini toqtatyp, QR Ákimshilik quqyqbuzýshylyq týraly kodekstiń 598-baby boıynsha hattama toltyrdy, — dep habarlady oblystyq PD baspasóz qyzmeti.

Zańǵa sáıkes arnaıy qyzmet kólikterine jol bermegenderge 20 AEK mólsherinde aıyppul salynady. Bul talapty barlyq júrgizýshi saqtaýy tıis.

Eske salsaq, Aqtóbede ondaǵan moped aıyp turaǵynda tur. Moped júrgizýshileri memlekettik tirkeýden ótpeı, kólik basqarǵan. Mundaı 100-den astam derek anyqtaldy.