Aqtóbede jedel-izdestirý sharalaryn júrgizý kezinde polıtseı oqqa ushty
ASTANA. 29 shilde. QazAqparat /Serik Sábekov/ - Búgin Aqtóbede polıtsııa qyzmetkeri men 10 shilde kúni jas jigitti óltirdi degen kúdikti azamat arasynda atys boldy, onyń barysynda polıtsııa qyzmetkeri qaza tapty.
Bul týraly agenttikke bergen suhbatynda QR ІІM resmı ókili Nurdildá Oraz málimdedi.
Onyń aıtýynsha, 25 shilde kúni Aqtóbe oblystyq ІІD qyzmetkerleri «Arlan» arnaıy maqsattaǵy qyzmet jaýyngerlerimen birlese atqarǵan shara kezinde qalanyń jaǵarmaı stansylarynyń birinde 10 shilde kúni Temirov esimdi azamatty óltirgen degen kúdikpen qylmystyq top múshelerin quryqtady. Olardyń birinen 9 mm. oqtary bar «TT» tapanshasy tárkilendi.
«Jubanovtar kóshesinde tórtinshi kúdiktini - esh jerde jumys jasamaıtyn 24 jastaǵy aqtóbelikti ustaý kezinde, polıtseıler men onyń arasynda atys týyndady. Jas jigit ishki ister organdarynyń qyzmetkerlerine qarýly qarsylyq kórsetti. Turǵyndardyń qaýipsizdigin qamtamasyz etý maqsatynda, jaqyn jerdegi úılerdiń turǵyndary qaýipsiz jerge kóshirilip, kúdiktiniń kózi joıyldy. Odan polıtseıler tegis uńǵyly sholaq myltyq pen oq-dárilerdi tapty», - dedi N.Oraz.
QR ІІM habarlaýynsha, olardyń qylmystyq baılanystaryn anyqtaý maqsatynda ІІD qyzmetkerleri tergeý sharalaryn keń aýqymda júrgizdi.
Máselen, shuǵyl túsken aqparatty tekserý kezinde «Jańa jol» saıajaı alabyndaǵy salynyp bitpegen úıde polıtsııa qyzmetkeri ulty azıattyq áıeldi baıqap qalady, ol ózin sol úıdiń ıesimin dep tanystyryp, polıtsııa qyzmetkerin úıge bastap kiredi. Sol kezde ǵımaratta oq atylyp, úıde jarylys bolǵan. «Oblystyq ІІD ekstremızmmen kúres basqarmasynyń 1983 jyly týǵan shuǵyl ókili Rústem Kenjalın oqqa ushyp, qaza tapty», - dep tolyqtyrdy N.Oraz.
Odan bólek, ol oqıǵa ornynda taǵy bir adamnyń máıiti men jaraqat alǵan er adam tabylǵanyn atap ótti. Olardyń kim ekeni anyqtalyp jatyr. Jaraqat alǵan kúdikti aýrýhanaǵa jatqyzyldy.
QR QK 96 «Kisi óltirý» baby boıynsha qylmystyq is qozǵaldy.
