Aqtóbede jazýlar men órnekterdi beıneleıtin erekshe tsıfrlyq sýburqaq synaqtan ótkizildi
AQTÓBE. KAZINFORM - Aqtóbede Ábilqaıyr han dańǵyly boıyndaǵy «Aqtóbe» qonaqúıiniń mańynda tsıfrlyq fontan synaq rejıminde iske qosyldy. Onyń ereksheligi — sý aǵyndary arqyly túrli órnekterdi, áripter men jazýlardy beıneleýge bolady.
Fontan qalanyń qoǵamdyq keńistigin abattandyrý jumystarynyń alǵashqy kezeńi aıasynda ornatyldy.
Qaraýsyz qalǵan aýmaq qala menshigine qaıtaryldy.
Qonaqúı mańyndaǵy aýmaq uzaq jyldar boıy jeke menshikte bolyp, qaraýsyz qalǵan. Ony qala menshigine qaıtarý úshin sot protsesteri júrgizildi. Bıyl jer telimi qalanyń menshigine qaıtaryldy.
Qala ákimi Azamat Beket bul aýmaqty turǵyndardyń demalýyna arnalǵan qoǵamdyq keńistikke aınaldyrýdy usyndy. Bastamany «Oil West» kompanııasy qoldap, abattandyrý jumystaryn óz qarajaty esebinen júrgizýge kiristi.
Búgin kompanııa mamandary tsıfrlyq fontandy synaq rejıminde iske qosty. Qala ákimi Azamat Beket turǵyndarmen birge jańa nysandy kórip, kompanııa ókilderine alǵysyn bildirdi.
-Fontandy synaq rejıminde qosyp kórip jatyr ekensizder. Óte ádemi, osy ortalyq dańǵyldyń boıyna jarasymdy boldy dep oılaımyn. Kún sýytqan soń, qys aılarynda zaqymdanbaýy úshin ony konservatsııalaý qajet. Sizderge alǵysymyz sheksiz. Kelesi jyly da osy jumysty jalǵastyryp, qonaqúıge deıingi aýmaqty tolyq abattandyryp beresizder dep senemiz, – dedi qala ákimi.
Qonaqúıge deıingi aýmaq abattandyrylady
Aldaǵy ýaqytta tsıfrlyq fontannan qonaqúıge deıingi 0,47 gektar aýmaqty abattandyrý josparlanyp otyr. Munda jasyl jelek otyrǵyzylyp, sýarý júıesi ornatylady. Sonymen qatar órnekti kespetas tóselip, jaryqtandyrý shamdary, oryndyqtar jáne turǵyndardyń demalýyna arnalǵan ózge de saıabaq jabdyqtary qoıylady.
Kompanııa ókilderiniń aıtýynsha, bıyl negizgi jumystar fontandy ornatýǵa jáne onyń aınalasyn abattandyrýǵa baǵyttalǵan.
-Biz qala ákimi Azamat Baýyrjanulynyń usynysyn qýana qoldadyq. Ózimiz de qalanyń kórkeıýine úles qosqymyz keldi. Fontannyń joǵarǵy bóligine elektrondy basqarylatyn arnaıy forsýnkalar ornatylǵan. Olar sýdy belgili bir ýaqyt aralyǵymen jiberip, sý aǵyndary arqyly túrli órnekterdi, áripterdi, jazýlar men logotıpterdi beıneleýge múmkindik beredi. Jaryqdıodty jaryqtandyrý bul kórinisti odan ári áserli etedi.
Fontannyń baǵdarlamasyn áli de jetildiremiz. Búgin ony synaq rejıminde iske qostyq. Batys óńirdegi, jalpy elimizdiń basqa qalalarynda dál osyndaı, sý aǵyndary arqyly órnekter men jazýlar qalyptastyratyn tsıfrlyq fontandy kezdestirmedik. Nátıjesi jaman emes dep oılaımyn. Eń bastysy, turǵyndarǵa unasa eken, – dedi «Oil West» JShS-niń jaýapty ókili Nurbolat Mataev.
