Aqtóbede jazǵy lagerge Reseıdiń 6 óńirinen etnıkalyq qazaq balalar keledi
Aqtóbede balalardyń jazǵy demalysyn uıymdastyrý birneshe baǵyt boıynsha júrgiziledi. Qala syrtynda, mektep janynda shatyrly lager uıymdastyrylady. Az qamtylǵan, ataýly áleýmettik kómek alatyn, jetim jáne ata-ana qamqorlyǵynsyz qalǵan balalar erekshe nazarda bolady.
«Jazda oqýshylardyń 90% demalys jáne saýyqtyrý is-sharasyna qatystyrylady. Arnaıy sanattaǵy balalar úshin bıýdjetten qarjy qarastyryldy. Olar úshin 320 mıllıon teńge qarjy bólinip otyr», - dedi oblystyq bilim basqarmasy basshysynyń orynbasary Nurgúl Bertileýova.
Tek óńirdegi oqýshylar emes, kórshi Reseı elinde turatyn qazaq balalary da Aqtóbede tynyǵady.
«Maýsym-tamyz aılarynda bilim alýǵa erekshe qajettilikteri bar balalarǵa arnalǵan «Kúnshýaq» lagerinde 312 bala demalady. Sondaı-aq, Balalar jyly aıasynda osy «Kúnshýaq» lageriniń bazasynda halyqaralyq tildik lagerdi uıymdastyrýdy josparlap otyrmyz. Lagerge Reseı Federasynda turatyn etnıkalyq qazaq otbasylarynyń balalary qatysady. Lager baǵdarlamasynda qazaq tiliniń sabaqtary uıymdastyrylyp, Qobda jáne Oıyl aýdandaryna bir kúndik ekskýrsııa josparlanyp otyr. Jospar boıynsha Reseıdiń 6 óńirinen 30 bala keledi. Olar: Altaı Respýblıkasy, Máskeý, Orynbor, Samara, Saratov, Chelıabi», - dedi Nurgúl Bertileýova.
Al týrıstik saıahatta 12 myńǵa jýyq bala qamtylady. Jospar boıynsha 9 myńnan astam oqýshy óńirdiń, ózgesi elimizdiń kıeli jerlerin aralaıdy.
«Jazǵy maýsymda óńirdegi 48 qosymsha bilim berý uıymy janynan da jazǵy alań men úıirme jumys isteıdi. Shyǵarmashylyq, sporttyq-týrıstik, ǵylymı-tehnıkalyq jáne tildik baǵyttardaǵy alańdar bolady. Sonymen birge jazǵy ýaqytta Áıteke bı, Baıǵanın, Yrǵyz, Qarǵaly, Temir, Oıyl, Hromtaý, Shalqar aýdandary men Aqtóbe qalasynda 10 myńǵa jýyq bala abattandyrý, kógaldandyrý jumystaryna tartylyp, eńbekpen qamtylady», - dedi Nurgúl Bertileýova.