Aqtóbede jazasyn óteýshiler nan pisirip, jıhaz jasap satady

Qylmystyq atqarý júıesiniń KA-168/2 túzetý mekemesinde jazasyn óteýshiler jumyspen qamtylǵan. Qazir túzetý mekemesinde naýbaıhana jumys istep tur. Munda táýligine 1 myń bólke nan pisiriledi. Barlyǵy 13 jazasyn óteýshi jumys istep, jalaqy alyp otyr.

«Naýbaıhanada arnaıy pesh bar. Jumys úzdiksiz júredi, suranys joǵary. Barlyǵy 13 adam eki aýysymmen jumys isteıdi. Peshten shyqqan nan yssy kúıinde túzetý mekemelerine jetkiziledi. Jumysshylardyń jalaqylary 35-40 teńge aralyǵynda dep bekitilgen. Aqsha olardyń arnaıy depozıt shotyna aýdarylady. Sonymen qatar, mekemede dúken bar. Jaza óteýshiler ózderine qajetti zattaryn satyp alady. Aspazdyq jazasyn óteýshilerdiń qolynan keletin jalǵyz is emes. Munda aǵash óńdeý tsehy da bar. Sandyq, besik jasap, shahmat taqtasyn da daıyndaıdy. Qurylys jumystarynyń kez kelgenin atqarýǵa múmkindik bar. Tsehta 15 jumysshy eńbek etedi», - dedi KA-168/2 mekemesi bastyǵynyń orynbasary Vıktor Erohın. Tsehqa jeke kásipker N.Marchýk ıelik etedi. Munda qolǵap ta tigiledi. Suranys boıynsha kúnine 1 myń dana jumys qolǵaby daıyndalady. Aldaǵy ýaqytta kúnine 2000-2500 qolǵap shyǵarý josparda bar.

«Tigin tsehynda 40 tigin mashınasy bar. Munda arnaıy kıimderge tapsyrys berýge bolady. Negizgi jaza óteýshilerge jumys berýshi - «Eńbek-Aqtóbe» RMK-nyń fılıaly. Óndiris aýmaǵynda ornalasqan tsehta 11 sottalǵan adam temir buıymdaryn shyǵarýmen aınalysady. Aqtóbe qalasynyń turǵyn úı-kommýnaldyq sharýashylyq bóliminiń tapsyrysy boıynsha qoqys shyǵaratyn jáshikteri jasalyp jatyr. Túrme qapasyna qamalsa da jazasyn óteýshilerdiń jumysqa degen qulshynysy zor»,- deıdi mekeme bastyǵynyń mindetin atqarýshy Baıhat Qazbaǵambetov.

Aıta keteıik, KA-168/2 mekemesinde 400-den astam adam jazasyn ótep otyrsa, onyń 165-i jumys isteıdi. Etikshi, shashtaraz, kitaphanashy, qoımashy, arnaıy kıimderdi jýýshy, monsha jaǵýshy, qyzmettik bólmelerdi jınap, tazalaýshy da jumys istep, aı saıyn jalaqy alyp otyr.