Aqtóbede jazasyn óteýshiden para alǵan túzetý mekemesiniń bastyǵy sottaldy
№2 Aqtóbe qalalyq sotynda QAJD KA-168/3 mekemesiniń bastyǵy D.Ábdirahmanǵa qatysty sot otyrysy boldy. Oǵan Qylmystyq kodekstiń «Para alý» baby boıynsha aıyp taǵyldy. Іs materıalyna súıensek, bıyl qyrkúıek aıynda D.Ábdirahman jazasyn óteýshiden 450 myń teńge para alǵan. Ol osy arqyly kameralyq úlgidegi úı-jaıdan kazarmaǵa aýystyrý jáne bolashaqta jumyspen qamtamasyz etýge ýáde etken. Sot otyrysynda sottalýshy óz kinásin tolyq moıyndady.
«Prokýror sottan 3 jyl 6 aı merzimge bas bostandyǵynan aıyrý túrindegi jaza taǵaıyndaýdy surady. Sot sottalýshynyń jazasyn jeńildetetin mán-jaı retinde shynaıy ókingenin jáne balalaryn negizge aldy. Degenmen sottalýshy antty buzǵan. Sot D. Ábdirahmandy memlekettik qyzmette eńbek etý quqyǵynan ómir boıyna aıyra otyryp, 3 jyl merzimge bas bostandyǵynan aıyrý túrindegi jaza taǵaıyndady», - dep habarlady Aqtóbe qalasy №2 sotynyń baspasóz qyzmeti.
Sot úkimi zańdy kúshine engen joq.