Aqtóbede jazasyn ótep shyqqandar qujat daıyndaýda qıyndyqqa ushyrasady
AQTÓBE. QazAqparat - Aqtóbede jazasyn ótip, bostandyqqa shyqqandardy beıimdeý jumysyna úkimettik emes uıymdar aralasty. Búgin Qylmystyq atqarý júıesiniń oblystyq departamenti, probatsııa qyzmeti men qoǵamdyq birlestik jumys júıeleýge kelisti, dep habarlaıdy QazAqparat tilshisi.
Aqtóbe oblysyndaǵy úsh tezetý mekemesinde 500-ge jýyq adam jazasyn ótip otyr. Olardyń 90-ǵa jýyq bostandyqqa shyqty. Janasynyń bir bóligin jeńildetkender men shartty jazaǵa kesilgender jáne jazasyn tolyq ótep shyqqandar úıine oralady, bolmasa áleýmettik beıimdeý ortalyǵyna barady. Bıyl 15 adam áleýmettik beıimdeý ortalyǵyn panalady.
«Barlyǵy 6 adam jumysqa ornalasyp, bireýi kolledjge oqýǵa tústi. Negizi jumys tabylady, oǵan qajetti qujat jınaıtyn aqsha joq. Qarapaıym ǵana eńbek kitapshasyn alý, medıtsınalyq tekserýden ótýge qarjy tappaı qınalady. Osy másele sheshimin tapqany durys. Keıbiri densaýlyǵyn syltaýratyp, jumys istemeıdi. Qazir bizde 62 jastaǵy er adam jatyr. Kózim kórmeıdi dep jumysqa barmaı qaldy. Ol adammen psıholog, polıtsııa ınspektory sóılesedi. Ereje boıynsha ortaq talapqa baǵynbaǵan adamdy ortalyqtan shyǵaryp jibere alamyz. Biraq olar qańǵybastar sanyn kóbeıtedi», - dedi Ómirlik qıyn jaǵdaıǵa tap bolǵandardy áleýmettik beıimdeý ortalyǵy dırektorynyń orynbasary Jalyn Moldaǵalıev.
Qylmystyq atqarý júıesiniń oblystyq departamenti quqyqtyq jáne psıhologııalyq qyzmet kórsetýge ázir úkimettik emes uıymmen memorandýmǵa qol qoıdy. Aldaǵy kúnderi aı saıyn mamandar túrme ishine kirip, keńes beredi.
«Jazasyn ótep shyqqandardy mindetti túrde bostandyqqa beıimdeý kerek. Olar úshin psıhologtar, zańgerler bar. Barlyǵy 11 maman aı saıyn túzetý mekemesine kiredi», - dedi «Senim-tirek» qoǵamdyq birlestiginiń tóraǵasy Temirjan Kúndolov.
Aqtóbe qalasyndaǵy Almaty aýdandyq probatsııa qyzmetinde 631 adam baqylaýda tur. Onyń ekeýi kámelet jasqa tolmaǵan. Baqylaýda júrgen 26 adam qaıta qylmys jasap, jazalandy. Jyl basynan beri bos oryndar jármeńkesine 58 sottalǵan qatysyp, 9-y jumysqa shaqyrý aldy. Alaıda jumys oryndarynyń talaptary men jalaqysyn unatpaǵan olar eńbekke aralasýdan bas tartty. Al qalanyń Astana aýdandyq probatsııa qyzmeti 1 myńnan astam adamdy qadaǵalaýǵa aldy. Barlyǵy 21 adam jumysqa ornalastyryldy.
