Aqtóbede jazasyn óteýshi túrme ishindegi beınebaqylaý kamerasyn syndyryp, qaıta sottaldy

AQTÓBE. KAZINFORM — Adam óltirip, urlyq jasap, tonaýmen aınalysqan eki jazasyn óteýshi № 8 túzetý mekemesiniń beınebaqylaý kamerasyn syndyrǵan. Ekeýiniń de jazasy aýyrlady.

Aqtóbe oblystyq prokýratýrasynyń arnaıy prokýrorlary № 8 mekemesinde jazasyn ótip otyrǵan A.Jarmuhanov jáne R.Jumashevqa qatysty isti tergedi. Іs Qylmystyq kodekstiń 428-1-baby 3-bóligimen (Qylmystyq-atqarý (penıtentsıarlyq) júıesi mekemelerinde, tergeý ızolıatorlarynda, ýaqytsha ustaý ızolıatorlarynda beınebaqylaý júıesin, sol sııaqty onyń komponentterin qasaqana joıý nemese búldirý) qozǵaldy. 

— 2024 jyly qarasha aıynda kisi óltirgeni úshin sottalǵan A.Jarmuhanov jáne tonap, urlyq jasaǵany úshin sottalǵan R.Jumashev birlesip, Aqtóbe qalasyndaǵy № 8 mekemesiniń beınebaqylaý kamerasyn búldiredi. Bul kamera ishki tártip rejımin baqylaýǵa arnalǵan. Jazasyn óteýshi A.Jarmuhanov ony serýendeý alańynda qasaqana isten shyǵarǵan. Aqtóbe qalasynyń № 2 soty sottalǵandardy kináli dep tanyp, burynǵy taǵaıyndalǵan jazalardy qosyp 7 jáne 6 jyl merzimge bas bostandyǵynan aıyrý jazasyn taǵaıyndady, — dep habarlady Aqtóbe oblystyq prokýratýrasy.

Aıta keteıik, Aqtóbede 200-den astam jazasyn óteýshi raqymshylyqqa iligedi. Raqymshylyqqa ilikken sottalǵandardyń bir bóligi bostandyqqa shyqsa, bir bóliginiń jazasy qysqarady.