Aqtóbede jataqhananyń birinshi qabatyndaǵy dúkennen órt shyǵyp, adamdar evakýatsııalandy

Aqtóbe qalasyndaǵy dúkennen órt shyǵyp, 8 adam qutqaryldy. Sonymen birge 20 adam evakýatsııalandy, dep habarlaıdy Kazinform.

Oqıǵa búgin saǵat 12:27–de Aqtóbe qalasy Rysqulov kóshesindegi kópqabatty jataqhanada boldy. Jataqhananyń birinshi qabatynda «Pennoe» dúkeni ornalasqan. Órt sóndirýshiler oqıǵa ornyna jetken kezde dúkende jıhazdyń janyp jatqany anyqtaldy.

«Órtti sóndirýge Aqtóbe oblystyq TJD 41 órt sóndirýshi men 9 tehnıka jumyldyryldy. Sondaı-aq oqıǵa bolǵan jerge Apattar medıtsınasy ortalyǵy fılıalynyń brıgadasy keldi. Baspaldaq marshy arqyly 8 adam qutqaryldy, onyń 5-eýi - bala. Sonymen birge 20 adam evakýatsııalandy. Barlyǵy 61 turǵyn ýaqytsha jylytý pýnkti sanalatyn «Kýng» avtokóligine ornalastyryldy», - dedi oblystyq TJD baspasóz qyzmeti.

Tilsiz jaý saǵat 12:48–de sóndirildi. Onyń aýmaǵy 40 sharshy metrdi quraıdy. Qazirgi kezde órttiń shyǵý sebebi anyqtalyp jatyr.