Aqtóbede jataqhana dálizinen tabylǵan bala anasyna qaıtaryldy
AQTÓBE. QazAqparat - Osy jyldyń qańtar aıynda jataqhana dálizinen tabylǵan 1 jastaǵy Nına Horenko anasyna qaıtaryldy.
Qalalyq bilim bólimi sábıdiń anasy Natalıa Horenkoǵa taǵy bir múmkindik berdi, dep habarlaıdy QazAqparat tilshisi.
Qańtar aıynyń basynda Nına Horenko Aqtóbe qalasyndaǵy jataqhanalardyń birinen tabyldy. Dálizde jatqan balany aýrýhanaǵa polıtsııa qyzmetkerleri tapsyryp, sýyq tıgen sábı birneshe kún em qabyldady.
Baldyrǵan keıin «Úmit» sábıler úıine jiberilip, polıtsııa qyzmetkerleri qyzyn tastap ketken Natalıa Horenkonyń meken jaıyn anyqtady. Belgili bolǵany, anasy Jańa jyl merekesin toılaýǵa aýylǵa ketip, qyzyn apasyna senip tapsyrǵan. Óziniń ishimdikke áýes emes, esirtki qoldanbaıtynyn eki aı boıy dáleldegen Natalıa Horenko analyq quqyǵynan aıyrylmady.
«Qańtarda sábı aýrýhanaǵa túsken soń qalalyq bilim bólimine habar 13-i kúni jetti. Málimet boıynsha, qaladaǵy Elek polıtsııa bólimi oqıǵany 7 qańtar kúni tirkegen . Nına Horenkonyń anasy 16 qańtar kúni qalalyq bilim bólimine kelip, óz balasyn alǵysy kelitinin túsindirip, ótinish jazdy. Sózine sensek, ol Rojdestvo merekesin toılap, Kirpishti aýylyndaǵy kórshilerine qonaqqa ketken. Al balasyn týysyna, ıaǵnı, apasyna qaldyrǵan. Elimizdiń «Neke jáne otbasy týraly» Kodeksine sáıkes, oqıǵa birinshi ret tirkelgen soń qujattardy jınap-tapsyrýǵa múmkindik berdik. Ol medıtsınalyq anyqtama tapsyrdy»,- dedi qalalyq bilim bóliminiń bas mamany Raıgúl Qonaqbaeva.
40 jastaǵy Natalıa Horenko medıtsınalyq anyqtamalyqpen qatar polıtsııa bóliminen de buryn zań buzbaǵanyn rastaıtyn qujat tapsyrdy. Kórshileri de shaǵym aıtpaǵan eken. Qajetti qujattar túgel jınaqtalǵan soń qalalyq bilim bólimi Horenkonyń turmystyq jaǵdaıyn qarap shyqty. Mamandar «qanaǵattanarlyq, balanyń turýyna múmkindik bar» degen sheshimge keldi.
«Aqpan aıynda qorǵanshylyq keńesi ótti. Sol kezde Natalıa Horenkony komıssııaǵa shaqyrǵan edik. Ol «bul oqıǵa birinshi ret bolyp tur, 40 jasymda dúnıege ákelgen balamdy eshkimge bermeımin» dep ótinish aıtty. «Neke jáne otbasy týraly» Kodeksine sáıkes, anasy qatelik jiberip, keıin ókinip, balany ózim baǵamyn dese, sábıdi keri qaıtaramyz. Biraq eskertý berildi. Aldaǵy ýaqytta bul is qalalyq kámeletke tolmaǵan balalardyń isi jónindegi turaqty komıssııada taǵy qaralady. Mindetti túrde anasyna aıyppul salynady. Taǵy qaıtalansa, aıyppul salyp, analyq quqyǵynan aıyra alamyz»,- dedi qalalyq bilim bóliminiń bas mamany Raıgúl Qonaqbaeva.
Qazirgi ýaqytta qalalyq bilim bólimi pen polıtsııa qyzmetkerleri Horenkolar otbasyn únemi baqylap otyr.
