Aqtóbede jastardy baspanamen qamtý úshin jańa baǵdarlama iske qosylady
Aqtóbe oblysynyń ákimi Eraly Toǵjanov jastarmen kezdesý ótkizip, olardyń oıyn, usynysyn tyńdady.
Basqosýda erikti Baný Jolmaǵambetova jyl boıy oıda júrgen jobasy týraly aıtyp berdiń. Ol eńbekqor jastardyń óz baspanasy bolǵanyn qalaıdy.
«Almaty, Astana qalalarynda jastarǵa arnalǵan arnaıy baǵdarlama bar. Dál osyndaı joba bizge de qajet boldy. 35 jasqa deıingi jastar, bálkim jas otbasylar da bolar, 10-15 jylǵa nesıe rásimdeı alsa deımiz. Olarǵa qajetti jarnany ákimdik sertıfıkat túrinde berip, keıin paıyzsyz qarjyny qaıtarýǵa bolatyn baǵdarlamanyń qolǵa alynǵanyn qalaımyz. Ústemeaqysy 5 paıyz bolsa, tıimdi bolar edi. Bul usynysty óńir basshysy birden qoldady. Ári bir jyl ǵana emes, keler jyldary da osy baǵdarlamanyń júıeli jumys istegeni durys. Jyl saıyn 100-150 jas baspanaly bolsa, bul - úlken jetistik», - dedi Baný Jolmaǵambetova.
Prezıdenttiń jeńildetilgen nesıe berý arqyly jastardy baspanamen qamtý tapsyrmasyn Aqtóbe oblysy alǵashqylardyń biri bolyp oryndaıdy.
Oblys ákimdigi men «Otbasy banki» AQ arasynda turǵyn úı satyp alý úshin jeńildetilgen nesıe berýge arnalǵan qarajatty birlesip bólý týraly kelisimge qol jetkizildi.
«Bul baǵdarlama 35 jasqa deıingi aqtóbelikterdi qosa alǵanda, tıimdi sharttarmen nesıe rásimdep, páter satyp alýyna múmkindik beredi. Baǵdarlamaǵa qatysýshylardyń sanattary óńirimizdegi jastardyń belsendi ókilderimen birge qarastyrylyp, bekitiledi», - dedi aımaq basshysy Eraly Toǵjanov.
Aıta keteıik, Aqtóbede «Aqtóbe – múmkindikter mekeni» jastar forýmy ótti. Onda jastar saıasatyn damytýǵa qatysty ózekti máseleler talqylandy.
Forýmǵa Aqtóbe oblysynyń ákimi Eraly Toǵjanov, Asar Ume qoǵamdyq qorynyń negizin qalaýshy Ashat Nurmashev, túrli salalarda, sonyń ishinde kreatıvti ındýstrııada startaptardy sátti júzege asyrǵan jas kásipkerler qatysty.
Tsıfrlyq tehnopark qurý maqsatynda Aqtóbe oblysynyń tsıfrlyq tehnologııalar basqarmasy men «Next Gen Aktobe» IT birlestigi arasynda ekijaqty memorandýmǵa qol qoıyldy.
