Aqtóbede jastar jáne jasóspirimder arasynda jekpe-jekten el birinshiligi ótedi
AQTÓBE. QazAqparat - 11-14 naýryz kúnderi aralyǵynda Aqtóbede sporttyq jekpe-jek túrlerinen el birinshiligi ótedi, dep habarlaıdy QazAqparat tilshisi.
Jastar jáne jasóspirimder arasynda ótetin Qazaqstan birinshiligine 14 oblys pen Nur-Sultan, Almaty, Shymkent qalalarynan 300-ge jýyq sportshy qatysady. Epıdemıologııalyq jaǵdaıǵa baılanysty jarys kórermensiz ótedi. Sportsúıer qaýym jas palýandar arasyndaǵy básekeni áleýmettik jeli arqyly kóre alady.
«Aqtóbelik jas sportshylar jarys aldynda oqý-jattyǵý jıynyn ótkizdi. 10 kúndik jıynda jastar fızıkalyq, aıla-ádis jaǵynan sheberlikterin shyńdady. Ótken jyly bizdiń sportshylar jaqsy nátıje kórsetti. Bıylǵy meje chempıondyq ataqqa ıe bolý. Shákirtterimniń de alǵa qoıǵan maqsaty sol. Jarys bolǵan soń boljaý qıyn. Dese de bizdiń qurama sportshylary myqtylyǵyn dáledeıdi dep senemin», - deıdi Aqtóbe oblysy quramasynyń bapkeri Altynbek Maqashev.
Jarys QR Táýelsizdiginiń 30 jyldyǵy men Qajymuqan Muńaıtpasulynyń 150 jyldyǵy aıasynda ótedi.
