Aqtóbede Jastar saıasaty máseleleri basqarmasy qurylyp, basshysy taǵaıyndaldy

AQTÓBE. KAZINFORM – Aqtóbe oblystyq Jastar saıasaty máseleleri basqarmasyna Mırhan Ermaǵanbetov taǵaıyndaldy.

Aqtóbe oblysynda taǵy bir taǵaıyndaý boldy. Oblys ákimi baspasóz qyzmetiniń habarlaýynsha, QR Memlekettik qyzmet isteri agenttiginiń kelisimimen Mırhan Ermaǵanbetov Aqtóbe oblysy Jastar saıasaty máseleleri basqarmasynyń basshysy laýazymyna taǵaıyndaldy. Ol 1991 jyly Hromtaý aýdanynda dúnıege kelgen. 2012 jyly Qudaıbergen Jubanov atyndaǵy Aqtóbe memlekettik ýnıversıtetin, 2023 jyly Qazaqstan Respýblıkasy Prezıdentiniń janyndaǵy memlekettik basqarý akademııasyn támamdaǵan. 

Eńbek jolyn 2012 jyly Aqtóbe oblystyq tarıhı ólketaný mýzeıiniń ǵylymı qyzmetkeri bolyp bastap, «Nur Otan» partııasynyń «Jas Otan» jastar qanaty Aqtóbe oblystyq fılıalynyń atqarýshy hatshysy, Qazaq ınjenerlik-tehnıkalyq akademııasynyń Tilderdi damytý ortalyǵynyń dırektory bolyp jasaǵan. 

2015-2019 jyldary QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń sarapshysy, Din isteri jáne azamattyq qoǵam mınıstrliginiń jastar saıasaty departamentiniń bas sarapshysy, Qoǵamdyq damý mınıstrligi Jastar jáne otbasy isteri komıtetiniń bas sarapshysy, Aqparat jáne qoǵamdyq damý mınıstrligi Jastar jáne otbasy isteri komıtetiniń bas sarapshysy qyzmetterin atqarǵan.

 2019-2020 jyldary Aqtóbe oblysy ákimi apparatynyń personaldy basqarýdyń biryńǵaı qyzmetiniń basshysy bolyp jasaǵan.

2020 jyldyń qyrkúıek aıynan bastap Alǵa aýdany ákiminiń orynbasary qyzmetin atqaryp keldi.