Aqtóbede jasóspirimderge alkogol satqan dúken ıesi jaýapqa tartyldy
AQTÓBE. KAZINFORM – Aqtóbe polıtsııasy dúken ıesin ákimshilik jaýapqa tartyp, lıtsenzııasynan ýaqytsha aıyrdy.
«Jańa adamdar» jastar qozǵalysy kámeletke tolmaǵandarǵa ishimdik satqan satýshy men dúken ıelerin anyqtap júr. Aqtóbe qalasyndaǵy Bókenbaı batyr kóshesinde ornalasqan «Sát» dúkeni bir emes, eki ret eskertý aldy. Alǵashqysynda satýshy qateligin moıyndaǵanymen, arada bir aı ótkende dál sol buzýshylyq qaıtalandy.
– Kámeletke tolmaǵandarǵa ishimdik satý jaı ǵana zańbuzýshylyq emes, bul – jaýapkershilikten bas tartý. Adamdar beıjaı bolsa eshqandaı tekseris te, aıyppul da kómektespeıdi. Máseleniń sheshimi – ortaq kúsh-jigerimiz, - dedi «Jańa adamdar» jastar qozǵalysynyń múshesi Polına Rojkova.
Jastardyń aıtýynsha, dúken ıesi óz qateligin túsinip, keshirim suramaǵan. Kerisinshe ashýlanyp, balaǵattaǵan. Beınejazbany polıtsııaǵa tapsyrdy.
– Aqtóbe oblystyq polıtsııa departamenti ákimshilik isti tirkedi. Dúken ıesi Ákimshilik quqyqbuzýshylyq týraly kodekstiń 200-baby, ıaǵnı «Qazaqstan Respýblıkasy zańnamasynyń alkogol ónimin ótkizý jónindegi talaptaryn buzý» boıynsha ishimdik satý lıtsenzııasynan bir aıǵa aıyryldy, - dep habarlady oblystyq PD baspasóz qyzmeti.
«Jańa adamdar» jastar qozǵalysynyń baspasóz qyzmeti kásipkerler men qala turǵyndary arasyndaǵy jaýapkershilikti qalyptastyrýǵa baǵyttalǵan reıd jalǵasady.
Eske salsaq, «Jańa adamdar» jastar qozǵalysy buǵan deıin teńizdi qorǵaý maqsatynda jaǵalaýdaǵy elderge úndeý joldady.