Aqtóbede jasóspirim sýǵa batyp ketti
AQTÓBE. KAZINFORM — Oqıǵa Áıteke bı aýdany Aqqum aýylynda boldy. Ol shomylýǵa tyıym salynǵan jerde sýǵa túsken.
Aqtóbe oblystyq tótenshe jaǵdaılar departamenti baspasóz qyzmetiniń habarlaýynsha, qaıǵyly oqıǵa búgin, 2026 jylǵy 23 shildede boldy. Jasóspirimniń denesin sýdan qutqarýshylar alyp shyqty.
Departamenttiń málimetinshe, bıyl maýsym aıynan bastap mundaı qaıǵyly oqıǵalardy esepte alý tártibi ózgerdi. Tek memlekettik esepke jatatyn sý aıdyndaryndaǵy tabıǵı sıpattaǵy tótenshe jaǵdaı tirkeledi.
— 11 shilde kúni Aqtóbe qalasynyń Almaty aýdanyndaǵy Sazdy ózenine 1984 jyly týǵan er sýǵa batyp ketti. Oqıǵa ornyna jedel jetken qutqarýshylar onyń denesin jaǵadan shamamen 30 metr qashyqtyqtan, 3 metr tereńdikten alyp shyqty. Sol kúni Qobda aýdany Qaraqudyq aýyldyq okrýgine qarasty Kóktoǵaı aýyly mańyndaǵy Qaraqobda ózeninde de qaıǵyly jaǵdaı tirkeldi. Aldyn ala málimet boıynsha, 1990 jyly týǵan azamat shomylýǵa tyıym salynǵan jerde sýǵa túsken. Onyń denesin sol jerdegi adamdar shyǵardy, — dep habarlady vedomstvonyń baspasóz qyzmeti.
Demek, resmı derek boıynsha Aqtóbe oblysy boıynsha tabıǵı sıpattaǵy eki tótenshe jaǵdaı tirkeledi.
Tótenshe jaǵdaılar departamenti qaýipsizdik erejelerin qatań saqtaýǵa, jabdyqtalmaǵan jáne shomylýǵa tyıym salynǵan jerlerde sýǵa túspeýge, sondaı-aq balalardy sý aıdyndarynyń mańynda qaraýsyz qaldyrmaýǵa úndeıdi.
ІІM habarlaýynsha, shomylý maýsymy bastalǵaly beri elimizde 69 bala sýǵa batyp qaza tapty.
