Aqtóbede jasóspirimderge arnalǵan senim telefony iske qosyldy
Buqaralyq aqparat quraldaryndaǵy balalar men jasóspirimderdiń basyndaǵy qıyndyqtar men eresekterdiń olarǵa kórsetken zábirin kórgen úkimettik emes uıym ókilderi senim telefonyn iske qosty. 909-000 telefon nómiri úzilissiz, demalyssyz balalardy tyńdaıdy, máselelerin sheshýge kómektesedi.
«Aqtóbe qalasynyń áıelderdi qoldaý ortalyǵyna aptasyna 1-2 adam habarlasyp kómek suraıdy. Al balalar men jasósipirimdiń shaǵymy men aryzy qaıda túsip jatqanyn bilmeımiz. Sondyqtan jańa jobany qolǵa alyp, oblystyq bilim basqarmasymen birge jumys isteýdi jón kórdik. Máselen, bizge óz-ózine qol jumsamaq bolǵan qyzdyń kórshisi habarlasyp kómek surady. Biz barǵan kezde jasóspirim kópqabatty úıdiń shatyryna shyǵyp, sekirýge daıyndalyp otyr eken. Uzaq ýaqyt kelissóz júrdi. Sóılese kele bir er adamnan júkti bolǵanyn, alyp qashyp, birge turǵan soń jigiti odan bas tartyp, úıden qýyp jibergeni anyqtaldy. Anasy da alǵashynda qyzy týraly estigisi kelmedi. Mamandar túsindirý jumystaryn júrgizip, ana men qyzyn tatýlastyrdy. 17 jasynda qıyn jaǵdaıǵa tap bolǵan qyz qazir jumys isteıdi, balasyn ózi tárbıelep júr», - dedi Aqtóbe qalasynyń áıelderdi qoldaý ortalyǵynyń tóraıymy Aıgúl Dúısenova.
Aqtóbedegi senim telefony balalarǵa quqyqtyq, psıhologııalyq kómek beredi. Joba avtorlary tegin qyzmetti iske qosyp, nátıjeli jumys isteýi úshin 7 mıllıon teńgeden astam qarjy jumsamaq.