Aqtóbede jasóspirimder tóbelesip, bireýi pyshaq jaraqatyn aldy
AQTÓBE. QazAqparat – Aqtóbeniń Embi qalalyq aýrýhanasyna 16 jastaǵy jasóspirim pyshaq jaraqatymen tústi. Qazir qylmystyq is tergelip jatyr, dep habarlaıdy QazAqparat tilshisi.
Aqtóbe oblysy, Muǵaljar aýdany, Embi qalasynda jasóspirimder tóbelesip, biri ekinshisine pyshaq suǵyp alǵan.
«Embi qalalyq aýrýhanasynyń qabyldaý bólimine belgisiz adamdar 2005 jyly týǵan jasóspirimdi pyshaq jaraqatymen jetkizdi. Polıtsııa qyzmetkerleri jedel is-sharalar ótkizý barysynda 16 jastaǵy jasóspirimdi anyqtap, ustady. Kámeletke tolmaǵan eki balanyń arasynda daý-damaı týyndap, sonyń saldarynan biriniń ekinshisine pyshaq jaraqatyn salǵany belgili boldy», - dep habarlady oblystyq PD baspasóz qyzmetiniń jetekshisi Erbolat Sarqulov.
Qazir osy oqıǵaǵa baılanysty Qylmystyq kodekstiń «Densaýlyqqa qasaqana aýyr zııan keltirý» baby boıynsha sotqa deıingi tergeý amaldary júrgizilip jatyr. Polıtsııa men bilim berý organdary mán-jaıdy anyqtaý maqsatynda tekseris júrgizedi.
«Kámeletke tolmaǵan balalardyń arasyndaǵy quqyq buzýshylyqtyń aldyn alýǵa bolady. Tek aldyn alý jumystaryna otbasy men jaqyn adamdary tartylýy kerek», - deıdi Aqtóbe oblysy PD bastyǵy Atyǵaı Arystanov.
