Aqtóbede jasandy sý qoımasynda afrıkalyq jaıyn ósiriledi
Aqtóbe oblysynda dástúrli emes sharýashylyqtar eshki baǵyp, bal óndirip jatyr. Úı qoıany, bódene, úırek sharýashylyǵy da tańsyq emes. Bıyl Aqtóbeniń Alǵa aýdany, Tamdy aýylynda túıequs sharýashylyǵy óz jumysyn bastaıdy. Bir mezette kókónis te egiledi. Ol úshin Tamdy aýylynda 40 gektar jer bólindi. «Sharýashylyqtyń jumysy erekshe. Tómengi qabatta túıequs, qoıan ósirilip, joǵary qabatta kókónis egiledi. Bul eki qabatty jylyjaı. 2,4 myń qus ósirildi, olarǵa 4 aı kútim kerek. Qoıan úsh aı ósiriledi. Jobalyq quny - 357 mıllıon teńge. Qurylys bıyl bastalyp, aıaqtalady», - dedi Alǵa aýdanynyń ákimi Naǵymjan Aldııarov.
Qazir Aqtóbe oblysy boıynsha dástúrli emes 263 sharýashylyq bar.
«Sharýashylyq ótken jyly 23 tonna ara balyn, 220,5 tonna eshki sútin, 6 tonna qoıan etin, 3 mln dana bódene jumyrtqasy men 134 tonna qus etin óndirdi. Sondaı-aq, oblys aýmaǵynda respýblıka boıynsha eń úlken tańqýraı alqaby bar. Barlyǵy 45 gektardan ónim jınaldy. Al 2022 jylǵa deıin alqap kólemin 150 ga jetkizý josparlandy. Ótken jyly quny 430 mln teńgege kólemi 1,1 ga bolatyn qulpynaı ósirý jylyjaı kesheni iske qosyldy. Bıyl 60 tonna ónim alý josparlandy», - dedi Aqtóbe oblystyq aýyl sharýashylyǵy basqarmasynyń basshysy Qusaıyn Sársembaı.
Aıta keteıik, bıyl quny 1,2 mlrd teńge bolatyn iri joba iske asyrylady. Jospar boıynsha jasandy sý qoımasynda afrıkalyq jaıyn ósiriledi. Munda jylyna 2 myń tonna ónim óndirilip, eksportqa shyǵarylady.
