Aqtóbede jas jigitti uryp, sańyraý etken ýchaskelik polıtseıge úkim shyqty
AQTÓBE. QazAqparat - Dámhanada súıiktisimen otyrǵan jas jigitti uryp, esinen tańdyrǵan aqtóbelik polıtsııa qyzmetkerine sot úkimi shyqty, dep habarlaıdy QazAqparat tilshisi.
26 jastaǵy Aslan Sársenǵalıev Aqtóbe qalasyndaǵy dámhanalardyń birine súıiktisimen kezdesýge barǵan. Sol demalys ornynda bolǵan polıtsııa qyzmetkeri Aıbek Alıshev jábirlenýshi Aslan Sársenǵalıevtiń janyndaǵy qyzdy bıge shaqyrǵan. Eki jigit arasyndaǵy daýdan tóbeles shyǵyp, biri soqqyǵa jyǵyldy. Alǵashynda úıine baryp, keıin aýrýhananyń jansaqtaý bólimine túsken Aslan Sársenǵalıevtiń qulaǵy múlde estimeı qalǵan.
Buǵan deıin habarlaǵanymyzdaı, qulaǵy estimeı qalǵan jas jigittiń sóıleý qabileti de joǵalyp barady.
Alǵashynda Qylmystyq kodekstiń «Densaýlyqqa qasaqana aýyr zııan keltirý» baby boıynsha is qozǵalyp, keıin is materıaldary «Densaýlyqqa abaısyzda zııan keltirý» babyna aýystyryldy.
Aıta keteıik, sot otyrysy kezinde jábirlenýshi Aslan Sársenǵalıev ózin urǵan polıtsııa qyzmetkerin keshiretinin, densaýlyǵyna keltirilgen shyǵyn tolyq ótelgenin aıtty. Tipti, sottalýshyny bas bostandyǵynan aıyrmaýdy surady.
«Aıbek Alıshev Qazaqstan Respýblıkasynyń Qylmystyq kodeksiniń 114-baby 3-bóligimen kózdelgen qylmysty jasaǵany úshin kináli dep tanylsyn. Oǵan probatsııalyq baqylaý belgileýmen 1 jylǵa bas bostandyǵyn shekteý jazasy taǵaıyndalsyn. Aıbek Alıshevtiń kepil túrindegi bultartpaý sharasy joıylsyn»,- dep oqydy úkimdi sýdıa R.Kúzenbaeva.
Sonymen qatar sottalýshy Temir aýdandyq probatsııa qyzmetiniń ruqsatynsyz oıyn-saýyq mekemelerine bara almaıdy.
Sot úkimi zańdy kúshine engen joq.
