Aqtóbede jas jigitti pyshaqtap óltirgen «Altyn belgi» ıegerine úkim shyqty
AQTÓBE. QazAqparat - Aqtóbede kámeletke tolmaǵan Azat Dúsipovti pyshaqtap óltirgen Beknaz Keńshilikke sot úkimi shyqty. Ol 9 jylǵa bas bostandyǵynan aıyryldy, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda sottalýshy Beknaz Keńshilikke sot úkimi shyqty. Sýdıa Azat Dúsipovtiń júregi, ókpesine birneshe ret pyshaq suqqan B.Keńshiliktiń oqıǵa ornynan qashyp ketkenin atap ótip, onyń qylmysqa josparly túrde barǵanyn aıtty.
«Beknaz Keńshilik Qylmystyq kodekstiń «Adam óltirý» baby boıynsha aıypty dep tanylyp, 9 jylǵa bas bostandyǵynan aıyrý jazasy taǵaıyndalsyn. Jazasyn qylmystyq atqarý júıesiniń qaýipsizdigi ortasha mekemesinde ótesin», - dedi sýdıa Altynbek Sabyrov.
Aıta keteıik, jábirlenýshi tarap materıaldyq shyǵyn retinde 3 mıllıon teńgeden astam, moraldyq shyǵyn úshin 10 mıllıon teńgeden astam aqsha surady. Sot tek 2,6 mıllıon teńge materıaldyq, 3 mıllıon teńge moraldyq shyǵyndy óndirý zańdy dep sanaıdy.
Buǵan deıin habarlaǵanymyzdaı, Aqtóbede eki mektep túlegi arasyndaǵy ózara kelispeýshilik ólimmen aıaqtaldy. Pyshaq jaraqatynan №19 orta mekteptiń túlegi Azat Dúsipov aýrýhananyń jansaqtaý bóliminde qaza tapty. Sotqa deıingi taldaý kezinde aıyptalýshynyń qorǵaýshylary qaza bolǵan Azat Dúsipovtiń ata-anasynan keshirim surady.
Al negizgi sot otyrysy kezinde eki jigit arasyndaǵy janjal bı alańynda bastalǵany belgili boldy. Jaryssóz kezinde prokýror aıyptalýshyny 9 jylǵa bas bostandyǵynan aıyrýdy surady.
